لە هیچ سەردەمێکدا بەقەد ئەم سەردەمەی ئێستا، کوردستان بە دەست کۆلکە نووسەرە ئایدیۆلۆژیست و نائایدیۆلۆژیستە هەنبانە دڕاوەکان و نانووسەرە نزم ئاست و نەفامەکانەوە نەیناڵاندووە.
هەر بابایەو بە هەوەسی خۆی دەستی داوەتە هۆنینەوەی شانامەیەکی بێ سەرووبەرو نووسینی وتارو دەقی بێ مەغزاو نائاکادێمی و ئینشایی و زۆر بێ بەزەییانە، بەربوونەتە هەموو ئەو شتانەی وەک رەمز و سیمبولی نیشتیمانی و نەتەوەیی ساڵەهایە ئەم گەلە خێرلەخۆ نەدیوەی بە زیندوویی و یەکگرتوویی هێشتۆتەوە.
یا ئەوەتا ئەو بڕە خوێندەواریەشی هەیەتی، بە تەواوەتی دەخاتە خزمەت شانامەنووسین و بە شان و باڵ و دەنووک هەڵدانی بەرپرسان و بردنیان بۆ تاقی ئاسمان و ژەنینی زوڕناو دەهۆڵ و دەروێش ئاسا بە لێدانی دەفێکی چڵکنی رزیوەوە کەلە سەری هەمووان کاس دەکات .
شۆڕشی تێکنۆلۆجیاو لەپاڵ لەدایک بوونی سۆشیال مێدیا، سەرباری ئەوەی خاڵێکی گەورەی وەرچەرخان بوون لە دونیای زانیاری و زانست و گەیاندن و گواستنەوەی هەواڵ و گەشەی رووبەری پەیوەندیەکان، بە هەمان قەوارەش دەیان خاڵی نەرێنیان لەگەڵ خۆیان هێنایە ناو دونیای راگەیاندنەوە.
لەئێستای کۆمەڵگەی کوردیدا کۆمەڵێکی دیاریکراوی کاڵفام و کەم فام و ئاست نزم و بکەرە کارتۆنیەکانی رووبەری سۆشیال مێدیا، بەدەر لەهەر ئیعتیبارو بەهایەکی کۆمەڵایەتی و مۆڕاڵیەوە بە ئارەزووی خۆیان شت دەنووسن. بەشێکی گەورەی نووسینەکانیش بەهۆی ئاست نزمی و غیابی هەستی بەرپرسیارەتیەوە، بوونەتە هۆکاری گێژاوێکی ناکۆتا و بڵاوکردنەوەی نائومێدی و تووڕەیی و خەفەت و نیگەرانیەوە.
ئەم جۆرە نووسینانە نەک هەر خزمەت بە پێکەوەژیان و تەبایی و هێورکردنەوەی دۆخی پڕلە گرژی و تووڕەیی کۆمەڵگا ناکەن، بەڵکو بوونەتە فاکتەرێکی یەجگار گەورە و زیانبەخش بە ئاڕاستەی تێکدانی شیرازەی جڤاک و هیلاک و ماندوو کردنی تاکەکانەوە.
نووسەرە خۆڵەمێشیەکانی رووبەری مەجازی و سەرزەمینی بێ دەرو دەروازەی سۆشیال مێدیا، بەرهەمهێنەری ئەدەبیاتێکی ناشرین و پەک کەوتوو و پڕ لە وشەی بەشیاوو نابەجێ و لە جوانی خراوو شەڕەنگێزی و تووندوتیژن.
بەشێک لە نووسینی بەناو نووسەرو لووسکەنووسەرو کاڵنوس و نۆسەرەکانی پانتای نووسین و ئەدەبی کوردی لە پێ دەشتەکانی مێدیای مەجازی و ئێلێکترۆنی، بێ سڵەمینەوە لە مەترسیەکانی برەودان بە ئەدەبی کرچ و کاڵی بێ ناوەرۆکی مەجازی و نائاکادێمی و لاسایی کردنەوەو کۆپی کردنی بێ مۆڵەت، تادێت هەژمونیان بەسەر رووبەری دونیای نووسیندا زیاتر دەردەکەوێ و لەهەموو پەیج و سەکۆو ماڵپەڕێکی مەجازی دەیانبینیەوە.
غیابی لێ نەپرسینەوەو خستنەبەر بەرپرسیارەتی ئەدەبی، واقعێکی ناشرین و پڕ لە گرژی و سەنگەر لە یەک گرتن و زەق کردنەوەی ناکۆکیەکانی لێ کەوتۆتەوە. ئەم واقعە لە خراپترین فۆڕمیدا لە هەندێ لە شارو دەڤەرەکانی کوردستان، لە چەشنی شوناس و پێناسی کۆمەڵایەتی مامەڵە دەکرێ و بە پاڵپشتێکی دارایی قەبەوە گرووپی تایبەتی شاراوەو دەمامکدار، سەرپەرەشتی و ئیدارەی دەکەن و لە بنکۆڵ کردنی کۆمەڵگاو داماڵینی لە هارمۆنیاو ڕێزو سۆزو خۆشویستن بەردەوامن.
لەم دۆخە پڕ لە نیگەرانیەدا، رەنگە گەشەی سەرسووڕهێنەری تەکنۆلۆژیاو داهێنانە ئەلەکترۆنیەکان لە ئاییندەدا، دونیای مۆڕاڵ و دۆخی سایکۆلۆجیاو ئاکارە ئینسانیەکان بخاتە ژێر فشارێکی یەجگار گەورەو بێ کۆنترۆڵەوەو شیرازەی خێزان و کۆمەڵگا و پەیوەندیە ئینسانیەکان، رووبەرووی دڵەراوکێی تەکنۆلۆجی و ترس و نائارامی دەروونی و دەیان ئاڵنگاری و کێشەی دەروونی و جڤاکی و رووخێنەرو بێ چارەسەری بکاتەوە.