ئاشکرایە لە ئەنجامی فراوانبون و گۆڕانکاری لە نەخشە و ماستەر پلانی ھەر شارێک کۆمەڵە کەسانێک سودمەند دەبن و بەپێچەوانەشەوە.
ھیچ بەنامۆی مەبینن گەر لەئەنجامی کشانی سنوری شارەکان و گەیشتنی سنوری شارەکان بۆ ھەندێک گوند و زەوی نزیک شارەکان ، کێڵگە و مەزراکان. خەڵکانێکی ھەژار، کەم دەرامەت، شوان، جوتیار، گوندنشین بوبنەتە ملێۆنیر . ئەم دیاردەیە لە چەند دەیەی ساڵانی ڕابردودا زۆر زەق و دیار بوو. ھەندێ جاریش ھەڵپەی چەند کەسانێک بۆ دەوڵەمەندبوون و دەستکەوتی تایبەت، کاریگەری ھەبوە لەسەر زو گەیشتنی شەپۆلی کشانی سنوری شار بەرەو ئاراستەیەکی مەبەست و دیاریکراو. ئەمەش لە ئەنجامدا بۆتە ھۆی ئەژمارکردنی شوێنێک، ڕوبەرێک لەزەوی یان گوندێکی نزیک شار وەک سنوری شار و خستنە ناو چوارچێوەی ماستەر پلانەوە.
کەواتە گەورەبونی قەوارەی شار لە ئەو دۆخەدا بریتی بوە لە ھەڵئاوسانی گیرفانی کۆمەڵە کەسانێک کە لە خەونیشدا پارە و سامان و دەوڵەمەندیان بەخۆیانەوە نەبینیبو.
ئێستا دۆخێکی پێچەوانە دەبینرێت؛ کەسانێک،کە خاوەنی توانا و ئەزمون و شوێنکاری چەند چەند ساڵەی خۆیانن و فەراھەمکردنی بژێوی ڕۆژانەی خێزانەکانیان لە ئەستۆدایە لە ناوەندی شاردا. کەچی بەناوی فراوانکردن و دیزاینی نوێی ناوەندی شار، کار و داھات و بژێوی ڕۆژانەیان لەدەست دەدەن. بەبێ ئەوەی ھیچ شوێنگرەوەیەک بۆ خەرجی و گوزەرانی ئەم کەسانە فەراھەم کرابێت. کەچی ڕاستەوخۆ جێبەجێکردنی نەخشەی سەنتەری شار لێرەوە دەستپێدەکەن.
ھەرچەندە ئەم پڕۆسەیە لایەنی ئەرێنی ھەیە و سەنتەرەکانی شار ڕۆژانە بەشێکی بەرچاو و بەکارھاتوی ھەزاران ھاوڵاتی و بیانین و پێویستە گرنگیان پێبدرێت تا سیمایەکی جوان نیشان بدەن. بەڵام لەلایەکی ترەوە کەسانێکی زۆر زەرەرمەند و دڵشکاو دەبن. کەواتە کێن ئەوانەی لە دۆخی نمایشکردنی شارستانیەت و فراوانکردن و ر ڕازاندنەوەی شار سودمەند دەبن یان دەبنە قوربانی؟