ترافیک لایت یان دەرۆزە لایت؟

هێمن ئەحمەد
  2023-03-07     436

ئەو دیاردەیەی وەک زۆربەی بابەتەکانی تر سیما و نازناوی شاری ڕۆشنبیری زڕاندوە و شێواندوە دیاردەی دەرۆزەکردنە لە ترافیک لایتەکانی شار. لەوەش قێزەونتر ئەوەیە هەندێک لەم دەرۆزەکەرانە لە ترافیک لایتەکانی دەروازەی هاتنەناوەوەی شار دەوەستن و بەبیانوی کاری دەرۆزەکردن خەریکی کاری لەشفرۆشین. ئەمەش دیمەنێکی ناشیرینی ئەم شارە دەگوازێتەوە بۆ بەر دیدەی سەردانکەران و ئەو میوانانەی ڕودەکەنە ئەم شارە. تایبەت ئەوانەی بۆ مەبەستی گەشت و گەڕان دێن.
جا تەنیا هەر دەروازەی شار نیە کە بەدەست ئەم دیاردەیەوە دەناڵێنێت. بەڵکو دەرۆزەکەران لە تەمەن و ڕەگەز و نەتەوەی جیاواز لە زۆربەی شوێنە گشتیەکان و تایبەتر لە ترافیک لایتەکان دەردەکەون. ئەم دەرۆزەکەرانە جگە لەوەی پێناسە و نازناوێکی ناشیرین دەبەخشن بەم شارە، هەندێکیان بەڕون و ئاشکرا تاوان ئەنجام دەدەن و کاری نابەجی دەخوڵقێنن لە؛ بەکرێدانی منداڵەکانیان بە خەڵکانی تر، پارە پەیداکردن بە منداڵان، دزیکردن و هەندێک جار گێچەڵکردن بە هاوڵاتیش جا گێچەڵی سێکسی بێت یان هی تر. دەرۆزەکەران لە ترافیک لایتەکان تێپەڕینی شۆفێران ناهەموار خاو دەکەنەوە لەو چەند چرکەیەی شۆفێر هەیەتی بۆ تێپەڕبوون. ئەوان دێنە ناوەڕاستی شەقام، پێش ئۆتۆمبێل و ئەملاولای شوفێر و سەرقاڵیان دەکەن و سەرنجیان دەبەن. زۆر جاران لایتی ئاماژەی تێپەڕین دادەگیرسێت هێشتا شوفێر ئاگای لێ نیە. هەندێک لەمانە لەسەر ناوەندی شەقام و شۆستەکان دادەنیشن و قاچ بۆسەر ڕێگاکە درێژ دەکەن و نمایشی سەیرو سەمەرە ئەنجام دەدەن، تا سەرنجی خەڵکی ڕابکێشن و ڕازیان بکەن بڕێک پارەیان پێبدەن. ئەوان نمایشکاری زۆر باش و لێهاتون. جارێک وەک کەم ئەندام بە دارشەق یان بە گالیسکەی کەم ئەندامانەوە و دێن و دەچن، جارێک هەڵگری لیستێکی پێویستی پزیشکی ساختە و جارێک بە کوڕوزانەوە و کلێنس ڕاگرتن، هەنێک لە منداڵەکانیش بە گوڵ ڕاگرتن و سڕینەوەی جامی ئۆتۆمبێلەکان بەبێ ئەوەی ڕەزامەندی شۆفێرەکان وەرگرن، مەترسی بۆ خۆیان و ناهەمواری زۆر بۆ شۆفێران دروست دەکەن. ئەم گروپ گەلە لە دەرۆزەکەران زۆر جار لەناو خۆیاندا لێیان دەبێت بە شەڕ و دەمەقاڵێ و جنێودان بە یەکتر لەسەر دەستکەوت و شوێن.
لە هەموی سەیر تر ئەوەیە لە هەندێ شوێندا ئەم کۆمەڵ گەلە دەرۆزەکەرانە نزیک پیاوانی پۆلیس دەوەستن و ئەم کارانە ئەنجام دەدەن و ئەوانیش هیچ گوێیان پێ نادەن.
گەر بمانەوێت دیمەنی ئەم شارە بەجوانی بهێڵینەوە و نازناوی شاری ڕۆشنبیری نەزڕێت، دەبێت بەزوترین کات دەسەڵاتی یاسای و شارەوانی هەڵوێستی ڕاست و دروست پیادە بکات بەرانبەر بەم گروپ گەلەو بنەبڕکردنی ئەم دیاردە قێزەونە. وە دەبێت بەردەوام چاودێری شوێنە گشتیەکان و ترافیک لایتەکان بکرێت، نەک بەشێوەیەکی کاتی لێرەو لەوێ ڕێ و شوێنی یاسایی بگیرێتە بەر و پاش ماوەیەک بابەتەکە پشتگوێ بخرێتەوە.

وتاری زیاتر

زۆرترین بینراو
© 2024 Awene Online, Inc. All Rights Reserved.
×