گیرانی مادۆرۆ لەناو ماڵەکەیدا و لەسەر جێگە خەوەکەی لە نیوەشەودا، لەشاری (کاراکاس)ی پایتەخت، لەلایەن ھێزەکانی(Delta Force) ی ویلایەتە یەکگرتوەکانەوە، کردەیەکی شۆک ھێنەر بو. تایبەت بۆ ئەو وڵات و ھێز و کەسایەتیانەی دژە ئەمریکا بون، چاوەڕوانی بەرگریەکی توندیان لە مادۆرۆ دژ بە ئەمریکا دەکرد. کەچی وێنەی مادۆرۆ بە کەلەپچەکراوی، ھەر زو سەر شاشە و پەیج و پەڕەی یەکەمی ڕۆژنامەکانی جیھانی تەنی.
ئەوەی زۆر نامۆ بینرا، ئەم سەرۆکە بەناو پاڵەوان و قسە زلە، تەنانەت نەیتوانی ھاوشێوەی سەردەستەی مافیایەک (godfather) یان تەنانەت ئەندامێکی ڕێکخراوەی مافیاگەری ( gangster)ێکی ئیتالیا و ئەمریکا، سەرۆک ھۆزێک، گروپێک یان کەسایەتیەک بەرگری لەخۆی بکات.
ئاشکرایە ھەر لەسەردەمی دەرکەوتنی ترامپ وەک سەرۆکی ویلایەتە یەکگرتوەکان، دژایەتیکردنی مادۆرۆ دەستی پێکرد. بەبیانوی تێوەگلان بە تیرۆرستی مادەی ھۆشبەر و  ناپاکی لە سپیکردنەوەی پارەدا. ھەچەند لەم دواییانەدا نیکۆلاس مادۆرۆ ئامادەیی خۆی بۆ گفتۆکردن لەگەل کاربەدەستانی ئەمریکا نیشاندا و ڕەزامەندی خۆی دەربڕی بۆ ھاوکاری و ڕێگەپێدانی کۆمپانیا نەوتیەکانی ئەمریکا، تا بەشداربن لە پرۆسەی بەرھەم ھێنانی نەوت لە فەنزویلا، بەڵام وەک دەڵێن مادۆرۆ زۆر درەنگ بەدەستھات و ھیچ شتێک نەبوە فریادڕەسی.
نیکۆلاس مادۆرۆ لە ساڵی ۲۰۱۲ دا بوە جێگری ھۆگۆ چاڤێزی سەرۆکی پێشوی وڵات. وە ھەر لەسەر ڕاسپاردە و متمانەی ئەو، کرا بە کاندیدی پارتی سۆسیالیزمی یەکگرتوی فەنزویلا و لەساڵی ۲۰۱۳ دوای مردنی چاڤێز پۆستی سەرەک وەزیرانی پێدرا.
پڕۆسەی ژیانی ئاسایی و سیاسی مادۆرۆ، ھاوشێوەی یاری مار و پەیژە، لەکەسایەتیەکی سادەی ناو کۆمەڵگەوە (شۆفێری لۆری) گەیشتە لوتکەی دەسەڵات(سەرۆک وەزیران)و پاشان لە لوتکەی دەسەڵاتەوە ھێنرایە خوارەوە، باڵام ئەمجارەیان بەبێ شکۆ و بەکەلەپچەکراوی بۆ بەردەمی دادگاو پاشان بۆ زیندانیکردنێکی ماوە نادیار.