بە خەمڵاندن و بۆچونی دوژمن و ھاوپەیمان و لایەنە دژبەرەکانی ئێران، ھەرگیز چاوەڕێ نەدەکرا ئێرا بەم شێوەیە بەرگەی جەنگێکی ئاوا فراوان و گەورە بگرێت. کە دەتوانین بڵێین بەرەی دژ بە ئێران و ھاوکارانی ئەمریکا؛ ژمارەیان دەیان وڵاتی ئەوروپی، بەنزیکەیی زۆربەی وڵاتانی عەرەبی و ئیسلامی تێپەڕاندوە. کە ھەریەک لەئەم وڵاتانە بە خاک و کردەی ئۆپراسێۆنی سەربازی، ھاوکاری لۆجستی و چەک و تەقەمەنیەوە بەشدارن.
ئینجا گەر بەراوردی توانای سەربازی، ھێزی ئاسمانیی و تەکنەلۆجیای نوێی ھەردوو بەرە بکەین، جیاوازیەکی زۆر گەورە بەدی دەکرێت.
ئەمە سەرەڕای کوژرانی دەیان سەرکردە و فەرماندەی بەتوانای ئێرانی، ھێشتا ھیچ بەرپرس و کاربەدەستێکی ئێرانی بەرەی جەنگ و وڵاتی جێنەھێشتوە و ڕاینەکردوە. کە ئەمە ئەوپەڕی توانا و بیروباوەڕی بەھێزیان نیشان دەدات.
لەگەڵ ئەوەشدا دۆخێ ئەمنی ناوخۆی ئێران و ئابوریەکەی زۆر لەبارێکی نالەباردایە، بەھۆی ئەو ئابڵوقە گەورە و درێژخایەنەی زیاتر لە چل ساڵە لەسەری سەپێندراوە.
لەلایەکی ترەوە، ڕاپەڕین و خۆنیشاندانی ھەزارەھا خەڵکی ناڕازی دژ بەو دەسەڵاتە، چەند ساڵێکە لەزۆربەی شارەکانی بەردەوامی ھەیە و جموجۆڵی دژبەرەکان و ئامادەکاری حیزبە ناوخۆییەکانی ئێرانیش لەلایەکی ترەوە بونی ھەیە.
ھێشتا ئێران موشەک و درۆنی گەیاندۆتە زۆربەی بنکە سەربازی و شوێنە بە ئامانج گیراوە جیاوازەکان لەوڵاتانی دەوروبەر و سەر کەشتیە زەبەلاحەکانی جەنگیی ئەمریکی لە دەریادا. ئەمە و گەیشتنی گورزی بەھێز و کەمەرشکێنیش بۆناو قوڵایی خاکی دوژمنی سەرەکی کە ئسڕائیلە، سەراپا دۆخ و سێکتەرەکانی ئیسڕائیلی شپرز کردوە.
ھێشتا دوای ئەو ھەمو زەرەر و زیانە و لەڕادەبەدەر بەھێزیەی ھاوپەیمانەکانی دژ بە ئێران و فراوانی بەرەی جەنگی ئاسمانی، دەریایی و وشکانی،دەسەڵاتی ئێران ھیچ خۆبەدەستەوەدانێکی لێ چاوەڕوان ناکرێت، ڕازیش نیە بە جێبەجێکردنی ئەو داواکاریانەی کە ئاراستەی دەکرێت لەلایەن ئەمریکاو ئیسڕائیلەوە. سەرسەختانە بەردەوامە لە لێدان و بەرپەرچدانەوە و کردەی سەربازی و تا ڕادەیەکیش دۆخی ناوخۆی ڕاگرتوە.
ھەرچەندە ھەڵگیرساندن و بەردەوام بون و کۆتای ھێنان بە جەنگ تەنھا لەسەر بڕیاری دولایەنی جەنگەکەیە و پشکی شێری زیانی جەنگەکەشیان بەردەکەوێت. بەڵام بەگشتی وڵاتان و خەڵکی ناوچەکەش بێ بەش نابن لە زیانی گیانی و مادی و ئەو دۆخەی کە لەئەنجامی ئەو جەنگە گەورەیە دروست دەبێت.
دەسەڵاتی ھەرێم بە تایبەت و کوردستان بەگشتی وا باشترە بەھیچ جۆرێک خۆیان لەم جەنگە و لایەنەکانیەوە نە ئاڵێنن ،تا کەمترین پیشکی ئاگرەکەمان بەربکەوێت. ئینجا ڕون و ئاشکرایە خواست و مەبەستی داگیرکەر و زلھێزەکان چیە و دەیانەوێت دەستیان بەچی بگات. پاشان کێ دەڵێت " لێکەوتە و دەرەنجامەکانی دوای بردنەوە یان دۆڕانی جەنگەکە لەبەرژەوەندی کورد و دەسەڵاتەکەی دەبێت؟"