ئایا ئێستا هەست بەئازاری ئەوانە دەکەین کە زۆربەی ژیانیان بەکەرەنتینەکراوی بەسەر بردوە؟
هێمن ئەحمەد
2020-03-26
ئێستا ئەم دۆخە باشترین ھۆکارە کە ئێمە والێبکات ھەست بەوە بکەین پێش ھاتنی کۆرۆنا و ئێستاش زۆر خەڵک ھەن بەردەوام لە کەرەنتینەی ناھەمواریدا ژیان بەسەردەبەن .
ھەیە چەندساڵێکە بۆ دوو خولەکیش دەرەوەی نەبینیوە بەھۆی نەخۆشی قورس و کەوتنی لەسەر جێگا.
ھەیە چەند ساڵێکە بێکارە خۆی لەماڵەوە کەرەنتینە کردووە بەرزی نەفسی ڕێگای پێنادات بێتە دەرەوە و خۆی بەراورد بکات بە خەڵکانی دەوروبەر و ھەست بە کەموکوڕی بکات .
ھەیەچەند ساڵێکە لە کەمپی پەنابەراندایە بەتایبەت لە ئەوروپا کەھیچ دۆخی لەئێستای ئێمە باشتر نیە.
ھەیە چەند ساڵە زیندانیە جا سیاسی یا ھیتر گرنگ دۆخێکی لەئەمەی ئێستا باشتریان نیە .
ئەدی ئەو ھەژارەی بەدرێژایی ژیانی چاوەڕێی دەستی خەڵکی ترە یان بۆ ساتێکیش وەک خەڵکی ئاسایی نەژیاوە .
ئەی ئەو گەنجەی چەندساڵێکە لەماڵەوە کەرەنتینەیە چاوەڕێێ ھەلێکی کارە یان ھەواڵی دامەزراندنە و ھاوڕێکەی دەبینێت کە چەند ملێۆن دینارێک موچەکەیەتی لەبەئەوەی
کەسوکاری بەرپرسێکە یان واستەی ھەبوە.
ئەی ئەو کچەی ھەموو تەمەنی گەنجایەتی لەماڵە باوکیدا کەرەنتینە بووە و تا بوە بە قەیرە و ئێستاش ھەر لە کەرەنتینەیە.
دە ئاوڕێک بدەنەوە لە خەڵکانی سوریا لەوێ نەک ھەر خەڵک بەڵکو ژیان و ڕۆح بۆ چەندساڵێکە کەرەنتینە کراون.
سەرنجێکی کەمینەکانی بۆرما بدەن سەرەڕای کەرەنتینە بونیان لە جەنگەڵەکاندا دەشیانکوژن.
ئەی نابینن منداڵانی ئەفریقی بەباوەشی دایکیانەوە لەبرسان گیان لەدەستدەدەن و چەند داڵێکیش بەسەریاندا خول دەدەن و چاوەڕێی ھەڵگرتنەوەی لاشەکانیانن ھەتا زوو بیانکەنە نێچیری بێچوەکانیان.دایکی داماویش بەھەموو ژیانی تەنھا ژەمێکیش سکی تێر نەبوە و لەدوای لەدەستدانی منداڵەکەی ئەمیش سەرەی بۆ کەرەنتینەی مەرگ گرتووە.
ئیتر کاتی ئەوە ھاتووە ئێمەش تۆزێ ھەست بە ناخۆشی و نیگەرانیەکانی ئەو کەرەنتینە کراوانە بکەین.
دەبێت تۆکمەتر و بەھێزتر خۆمان ئامادەبکەین بۆ ئەم دۆخە.بەڵام دەبێت ئەوەش بزانین کە سەراپا ژیان بۆ ھەندێک کەس ھەر کەرەنتینە بووە.
لای من ئەم دۆخە زۆر ئاساییە و دۆخی زۆر نالەبارترم بینیوە تایبەت لەماوەی ژیانم لە ئەوروپا. لەبەرئەوە ھەوڵدەدەم بەرگەی ئەم دۆخەش بگرم.
بەھیوای سەلامەتی بۆ ھەموو کەسێک لە ھەرشوێنێکی ئەم ماڵە ھاوبەشەی سەرزەویدا دەژین.