هەڵمەتی هەڵبژاردن یاخود شەری لاکۆڵان و قۆچانی
چیا عەباس
2021-10-02
هەر کەسێک بچێک خوێندەواری هەبێت و رۆژانە لە راگەیاندن و میدیاکاندا
چاوێکی هاکەزایی بە هەڵمەت هەڵبژاردنی دو هێزە سەرەکیەکەی کوردستاندا بخشینێت
تێدەگات کورد لە باشور لە چ نەگبەتی و
کارەساتێکدا دەگوزەرێت.
ناتان خوێنینەوە، هەرچیەک بکەن هەر لە دەرگای پارتی دەدەنەوە، هەمو پارتیبونێک
قەرزدارن، لای ئێمە حساب بۆ تۆ ناکرێ و وەختی وەڵامی تۆمان نیە ئاغای فەنتەلۆس،
ئەمە قسەی پەرڵەمانتارێکی پارتیە ئاراستەی قوباد تالەبانی کردوە، پەرڵەمانتارێکی
یەکێتی: پۆست و پایە مافی خۆمانە و لە چاوتان دەردێنین، حوکمرانی برا گەورەتان لە
دێگەلە بەولا بر ناکات، لەم جۆرە شەرە قسانە.
کۆمێنتەکەی شێخ ئەدهەم بارزانی لەسەر ئەم شەرە قسە بێ بەها و ناوەرۆک پوچەڵ،
لەوانە لە سەر تۆمەتبارکردنی سەرۆکی پەرڵەمان و جێگرەکەی ( یەکێتی و پارتی) حزبەکانی
یەکتر بە تەزویر، هەناو و ئەقڵیەتی ئەم هەڵمەتەی پێکاوە کاتێ دەڵێت: ئێوەی
بەرپرسانی دەسەڵاتی تەشریعی و چاودێری حکومەت گەر بە تەزویر هاتون چ کارەن لەو
دەزگا گرنگەی بونیادی حوکمرانی هەرێم.
تا ئێستا لە هەڵمەتی هەڵبژاردنی ئەو دو هێزەدا باسکردنی تێر و تەسەل دەربارەی
دیدگایان بۆ ناوەرۆکی جدی کێشە سەرەکیەکانی هەرێم و چۆنیەتی چارەکردیان بە دەگمەن
بیستراوە، وەک: ئایندەی ناوچە زەوتکراوەکان، ئایندەی کێشەکان لە گەڵ بەغدا، پرسی
نەتەوەیی لە بەشەکانی تری کوردستان، چۆنیەتی مامەڵەکردن لە گەڵ وڵاتانی دراوسێ،
پرسەکانی ئاسایش و تێرۆر و تەواجدی هێزە بیانییەکان لە کوردستان، تێرامان بۆ هۆکار
و چارەی کێشەکانی موچە و بودجە،خزمەتگوزاریەکان، ئابوری دارماو، کۆرۆنا و چەندین تەوەری
گرنگی تر.
لە بری ئەم پرسە هەستیارانە وەک منداڵی لاساری لاکۆڵان و بەزمانێکی زۆر زبری نەشیاو
و ناوەرۆکێکی روخێنەر خەریکی شەرە بەرد و دارلاستیک و قۆچانین.
سەردەمی شەرە پەرۆ و زمان و رەنگ نێوان ئەو دو هێزەم لە بیر نەکردوە، بێگومان ئەو
سەردەمانە وێرای قێزەوەنی روداوەکان و دەربرینی نەشیاوی ناکۆکیەکانیان، بەڵام
ناوەرۆکێکی فکری و حزبی و سیاسی هەبو کە بەشێک بون لە دو ناسنامەی جیاواز، ئەوەی
ئێستا بەرێوەدەچێت لە شەری لاکۆڵانیش بێ بەهاترە و ناسنامەش بەم شێوازە پێناسە
ناکرێت، دەیانەوێت بەم زمان و نیەتە بچنە بەغدا و ببنە نوێنەری میللەتێک، کە چاوەروانی
ئەوەیان لێ ناکرێت، هەزار رەحمەت لە کفن دز.
لەم بەینەدا گۆڕانی داماو کە بەشێکە لە دەسەڵات و کەوتۆتە نێو توێکڵە رەقی ئەم دو
هێزەوە لە قسەی بەتاڵ و حەتاڵ و سواو زیاتری لێ نابیسترێت: ئێمە هێزێکی سەربەخۆین،
گەندەڵیمان نەکردوە، لەسەر رێبازی چاکسازی بەردەوامین، بەم جۆرە قسانە گوایە
پشتێنیان خاو کردۆتەوە و چاوەروانن، بۆ چرکەیەشیش بوێری ئەوەیان نیە بە نوزەیەک لە
سوچێکی بنی هەمانەکە بدەن.
ئەمە کۆتای ئەم چیرۆکە نیە؟ پرسیارەکە ئەوەیە پارتی و یەکێتی خاوەنی ئەزمونێکی
دەوڵەمەندی دور درێژن لە هەڵمەتی هەڵبژاردان، ساختەکاری، هەڵخەڵەتاندن و ... تاد، پرسیارەکە
ئەوەیە لەم هەڵبژاردنەدا بە کاملی هۆشیاریەوە بۆ وادەکەن، بۆ بەو شێوازە نەشیاوە
کەوتونەتە گیانی یەکتر؟
ئایا ئەمە مەبەستی هاوبەشی لە پشتەوەیە؟ یاخود شەری منداڵانی کوچە و قۆچانیە؟
ئێستا زوە وەڵامی دروستی ئەو پرسیارە بدرێتەوە با چاوەروان بین تا بزانین دوای
هەڵبژاردنەکان وەک جاران: برامان برایی و کیسەمان جیایی یاخود کوردبونمان یەک
کوردبون و کیسەشمان بۆ کوردە، پێرەو دەکەن.
عەرەب وتەنی: الابکم یفهم من الاشارة
کورد وتەنی: ئەو کەسە کەسە کە ئەلفێکی بەسە