دکتۆرا لە دبلۆماسییەتی بەریتانیی
پێوەر لای من بۆ تاکی کورد: کوردپەروەرێتییە. منیش [بە کردەوە] لە هەمو سەرکردەکانی کورد خۆم بە کوردپەروەر تر دەزانم! بۆیە ئەم پەیامەت ئاڕاستە دەکەم.
لە سەرەتای هاتنەسەر دەسەڵاتت وەک سەرۆکی ئەنجومەنی وەزیرانەوە، لە دەیان بابەتم دا، چەندین تێفکرینی ستراتیژییم هەیە، کە: ستراتیژی بەرەی ئێران لێدانە لە مەسرور بارزانیی و کەسێتیی خودی مەسرور.
بەرەی ئێران گرنگی بە نێچیرڤان و یەکێتیی دەدەن و، تۆ وەک کاراکتەرێکی سەر بە ئیسرائیل دەبینن و، هەرگیز لە لێدان لە تۆ [لە هەمو ڕویەکەوە!] ناوەستن! بۆیە بە قسەی نەرمی ئێران و عێراق با فریوت نەدەن. وەک جەلال تاڵەبانیی و نێچیرڤان مەبە کە پەیامی ئێران بۆ ئەمریکا ببەیت.
فارس و تورک و عەرەب ئیمپریالیستیی هەمیشەیی سەر کوردستانن و، هەر ساتێک بچوکترین دەرفەتیان بۆ هەڵکەوتبێ و هەڵکەوێ؛ لە ئەتکردنی خوشک و دایکی کورد و جینۆسایدکردنی ملیۆنان کورد دەستیان نەپاراستوەو دەستیش ناپارێزن!
لێرە نامەوێت ئەو دەرچەیە زیاتر بکەمەوە، کە چۆن و بۆچی تۆ لەلای ئیسرائیل پەسەندیت و، کێ دەناسیت و، هتد!!!!
با بڕۆمەسەر پەیامەکەم، بەهۆی ئیسرائیلەوە؛ تۆ ئەی [مەسرور] لەلایەن ئەمریکاوە گرنگی زیاترت پێ دەدرێت. بەتایبەت کە دوو هەڵۆی وەک نەتەنیاهۆ و ترەمپ لەسەر حوکمن؛ چانسی تۆ زیاترە کە بەردەوام سەردانی ئەمریکا بکەیت و، بەرپرسە [کاریگەرەکان]ی ئەرمریکا، زۆرتر لە هەمو سەرکردەکانی کورد، ببینیت.
دڵنیابە ئەگەر ڕەحمەت و نیعمەت و بەرەکەتی ئیسرائیل لەم هاوینە بێ بارانەدا، بەسەر ڕژێمی فارس، دانەباریبایە؛ ڕژێمی فارس و پرۆکسییەکانی حەشدی شەعبیی؛ دەیانخواردی!
ئەوە ئیسرائیلی هەڵۆیەکی وەک نەتەنیاهۆیە، کە کونەمشکی لە ئاخوندە مرۆڤکوژەکانی ئێران و سەرکردە دڕندەکانی حەشدی شەعبی؛ کردۆتە قەیسەری!
یەکەم: گرنگە لە کۆبونەوەکانت لەگەڵ بەرپرسە کاریگەرەکانی ئەمریکا، شێلگیرانەو وردکارانە، بە ڕاپۆرتی شیکاریی ورد و بەڵگەدار، پرۆژە ترسناکەکانی ئێران و بەرەی مقاومە دژی بەرژەوەندییەکانی ئەمریکا لە عێراق بەتایبەت و، لە خورهەڵاتی ناوەڕاست بەگشتیی، بخەیتەڕو و، پێی لەسەر دابگریت. نەک تەنیا بە وتن بیڵێیت، بەڵکو گرنگە [ڕاپۆرتی شیکاری ورد و بەڵگەدارت] پێ بێت!!
وەک باوکت و جەلال تاڵەبانیی و نەوشیروان مەبە کە لە ساڵی ١٩٩١ لە پێناو خۆ نزیکردنەوەیان لە سەددام، هەستان دەیان هەزار ئەفسەر و سەربازی جینۆسایدکاری ئەنفال و کیمبارانیان بەگۆترەیی ئازاد کرد. ئەوەتانێ بەڵگەنامە نهێنییەکانی بەریتانیا، توانج لە باوکت و تاڵەبانیی و نەوشیروان دەدەن، کە دبلۆماتکارانی بەریتانیا بە سەرسوڕمانەوە لە ١٩٩٦ نوسویانە: "لە مێژوو دا نەبوە سەرکردەکانی گەلێک هەزاران ئەفسەر و سەربازی ئەتککار و جینۆسایدکارانی نەتەوەی خۆیان لە ١٩٩١ ئازاد بکەن، کەچی لە شەڕی ناوخۆی خۆیان دا بە پەرەمێز دیلی یەکتر بسوتێنن!". ئەم پەرەگرافەم واتە چی!؟
واتە: هیچ سۆزێکی [لا بەلا !!!!] نەتگرێ و، ئێران کە دەزانێ سەردانی ئەمریکا ئەکەیت با فریوت نەدات و، دڕندەییەکانی ئێران و بەرەی مقاومە بۆ بەرپرسە کاریگەرەکانی ئەمریکا بەرانبەر بە کورد بخەرەڕو.
دووەم: پرسی موچەی فەرمانبەرانی هەرێم لەگەڵ بەرپرسە کاریگەرەکانی ئەمریکا بکەرە تەوەرێکی سەرەکیی لە کۆبونەوەکانت دا. کە ئەوە سیاسەتێکی ئێران-عێراقە دژی نەتەوەی کورد لە باشوری کوردستان و، بەهۆی هاوپەیمانێتیی کورد و ئەمریکاوە، ئێران-عێراق گرتویانەتەبەر و، بۆ ماوەی زیاد لە دە ساڵە، گەللی کورد لە ڕوی ئابوریی و داراییشەوە جینۆساید دەکەن.
بۆ بەرپرسە کاریگەرەکانی ئەمریکای ڕونبکەرەوە: لەگەڵ ئەوەی گەللی کورد ئەمریکایان زۆر خۆشەوێ و، خۆیان بە هاوپەیمانیی ستراتیژیی و هەمیشەیی ئەمریکاو، پارێزەری بەرژەوەندییەکانی ئەمریکا لە ناوچەکە دەزانن. بەڵام خەڵکی کوردستان ئێستا ئەو گلەییەیان لە ئەمریکای هاوپەیمان هەیە؛ چۆن دەبێت هاوپەیمانێکی مەزنی وەک ئەمریکا، دە ساڵە دەبینێت لەلایەن ئێران-عێراقەوە، کورد لە باشوری کوردستان جینۆسایدی ئابوری دەکرێ و موچەی نادرێ؛ کەچی ئەمریکا تا ڕادەیەکی زۆر تەماشاکارە!
هەرچۆنت کردوە لە پرسی موچەی فەرمانبەرانی هەرێم؛ نیمچە گەرەنتییەک لە سەرکردە کاریگەرەکانی ئەمریکا وەربگرە!!
ئەزانم ئەوان دەکرێ بە [فەنی!!] دبلۆماسیی بڵێن: ئەوە پەیوەندی نێوان خۆتان و دەوڵەتی ناوەندی عێراقە!
بەڵام گرنگە تۆ لە ڕوی سیاسییەوە سەرکردە کاریگەرەکانی ئەمریکا قانع بکەیت، کە: ئەو سیاسەتی موچەبڕینەی ئێران-عێراق دژی فەرمانبەرانی هەرێم گرتویانەتەبەر بەهۆی ئەوەیە کورد هاوپەیمانی ئەمریکایە، بۆیە ئەو باجە دەدات.
شەرم مەکەو بۆشیان ڕونبکەرەوە کە ئێران-عێراق لەو ڕووەوە دەیانەوێ کەمینەیەکی کورد کە توڕەن لە بێموچەیی دا، لە ڕێی هێزە ئیسلامییەکانەوە، دژی ئیسرائیل و ئەمریکا بخەنەگەڕ، یاخود بیانقۆزنەوە!
سێیەم: پرسی کورد بە گشتیی، بە ڕاپۆرتی شیکاری ورد و بەڵگەدار، لە کۆبونەوەکانت باس بکە. واتە: تەوەری گفتوگۆکانت تەنیا لە دۆخی باشوری کوردستان، قەتیس مەکە. دۆخی سیاسیی و مرۆیی ناهەمواری کورد لە ئێران، تورکیاو، سوریاش، گەر بە یەک دێڕیش بێت؛ باس بکە.
یەکێک لە بەرهەمە بەنرخەکانی قاسملو لە دبلۆماسییەت دا، ئەوەبوە: باسی لە دۆخی کورد لە گشت بەشەکان کردوەو، لەکاتێکا پەیوەندی دبلۆماسیشیی لەگەڵ حکومەتی عێراق هەبوە؛ کەچی سڵی لە داگیرکەران نەکردۆتەوە. ئەمەش وایکردوە لای کورد خۆشەویست بێت. بەڵام ئێوە کە لە لوتکەی حکومەتییش دان؛ بۆچی باس لە پرسی کورد لە گشت بەشەکان لەگەڵ کاربەدەستە کاریگەرەکانی ئەمریکا ناکەن!؟
بەجۆرێک کورد لە گشت بەشەکان دەیانەوێ هاوپەیمانیی هەمیشەیی ئەمریکا بن و، بۆ هەمیشە پارێزەری بەرژەوەندییەکانی ئەمریکا بن. بەڵام خۆ ئەمریکاش پێویستە، ئیتر لە بەشەکانی لێکۆڵینەوەی خۆرهەڵاتی ناوەڕاستی وەزارەتی دەرەوەی دا؛ بەشێکی تایبەت بۆ پرسی کورد تەرخان بکات. چونکە کورد بە چل ملیۆن و گرنگترین جیۆستراتیژ و جیۆپۆلەتیکی خۆرهەڵاتی ناوەڕاستەوە دەبنە پارێزەری بەرژەوەندییە هەمیشەییەکانی ئەمریکا لە خۆرهەڵاتی ناوەڕاست دا. بۆیە ئیتر هەقیەتیی و پێویستە ئەمریکاش لە گۆڕانکارییەکان دا، گرنگی لەپێشینە بە پرسی کورد بدات و، بەشێکی تایبەت لە بەشەکانی خۆرهەڵاتی ناوەڕاستی وەزارەتی دەرەوە بکاتەوە بە ناوی: پرسی کورد!
ئەڵبەتە تۆ بەڵگەنامە نهێنییەکانی وەزارەتی دەرەوەی بەریتانیاو ئەمریکات خوێندۆتەوەو تێدەگەیت کە مەبەستم چییە؟
بۆ نمونە: پرسی ئیسرائیل لە بەشی خۆرهەڵاتی ناوەڕاستی وەزارەتی دەرەوەی ئەمریکا و هتد.
واتە: کاتێک بەشێکی تایبەتیان لە وەزارەتی دەرەوە تەرخان کرد بۆ پرسی کورد، نیشانەی ئەوەیە لە ڕوی ستراتیژییەوە ئەمریکا وا لە پرسی کورد دەڕوانێت کە گۆڕانکارییەکانی ناوچەکە دەبێت بەجۆرێک دابڕێژێت کە چارەسەری سیاسیی دۆزی کوردی تێدا لەخۆ بگرێت!
بێگومان ئەمریکاو ئیسرائیل چەند گۆڕانکارییەکیان لە ناوچەکە بەدەستەوەیەو، ئێستا زێڕینترین دەرفەتە بۆ کورد کە خۆیان ئامادە بکەن و بیقۆزنەوە. هەرئەوەشە، وا دەکات کە ئەمریکاو ئیسرائیل ئەکرێ گوێ بۆ ئایدیاکانی سەرکردەکانی کورد بگرن و، بزانن سەرکردەکانی کورد چی دەڵێن و ئیشیشیان بە کورد هەبێ!! بۆیە گرنگە سەرکردەکانی کوردیش لەم تەوقیتەدا بەتەواوی خۆیان بۆ ئەمریکا یەکلابکەنەوەو، ئەیڵێمەوە: وەک تاڵەبانیی و نێچیرڤان مەبە پەت پەتێن بکەیت و پەیامی ئێران بۆ ئەمریکا ببەیت.
وەک نێچیرڤان مەبە بە گوێی مەلابەختیار و قوباد بکەیت و [بە پیلانی شەیتانانەی ئێران!!] بڕۆیت لەگەڵ ڕوسیاو ڕۆزنەفت ڕێکبکەیت و، زیاتر ئەمریکاو ئەوروپا دژی ڕیفراندۆمەکە هان بدەیت. ئیتر سەردەمی پەت پەتێن نەماوەو، جیهان دابەش بوە بەسەر بەرەکان دا.
خۆتان بۆ ئەمریکا یەکلابکەنەوە. خۆ ئەگەر ئەمریکاو ئیسرائیل بزانن سەرکردەکانی کورد هەر خەریکی پەت پەتێنن لە نێوان ئێران، تورکیا و، ئەمریکا؛ سەردەمی شێخ مەحمودی موجاهیدی خەلیفەی عوسمانیی بەسەر کورد دا دێننەوە!!
بەدەر لەم پەیامەم، مەسرور ئەوەشت با لەیاد بێت: گرنگترین هەنگاو کە لە ناوخۆدا بیگریتەبەر؛ چاکسازی گشتگیری ناوخۆییە، کە تۆ تائێستا نەتگرتۆتەبەر.
لە هەڵەبجەو سلێمانییەوە تا دهۆک بزانە چەند بەڕێوەبەری فەرمانگاکان و بەرپرسانی زانکۆکان زیاتر لە چوار ساڵە لە شوێنەکانی خۆیان ماونەتەوە، کە ئەوەش لە ژێرپێنانی یاساو ڕێساکانە لەلایەن پارتیی و یەکێتییەوە.
خانەنشینکردنی پارلەمانتار و ڕاوێژکاران بە تەمەنی گەنجییەوە، دیسانەوە لەژێر پێنانی یاسایەو، هەزاران گۆبەندی تری ئێوەی یەکێتیی و پارتیی پێویستە چاکسازی گشتگیری تێدا بکرێ. بەڵام پەیامەکەم تەنیا بۆ ڕەهەندی دبلۆماسیی کورد و ئەمریکا بو، نەک پرسی گۆبەندی ناوخۆیی ئێوەی پارتیی و یەکێتیی.