دکتۆرا لە دبلۆماسییەتی نێودەوڵەتی بەریتانیی
خۆراوای کوردستان پێویستییەکی بەردەوامی بە پشتیوانییەکی یەکدەستانەی نەتەوەیی تەواوی ڕۆڵەکانی نەتەوەی مەزنی کورد هەیە.
خۆراوای کوردستان لەلایەک هەر ساتێک پێویستە بەرگرییەکی پڕشکۆمەندانەی نەتەوەیی ئەنجام بداو، لەلاکەی تریش [دەبێت] کوردانی گشت پارچەکانی کوردستان لە مانگرتن و خۆپیشاندانی بەردەوام، بەتایبەت کوردانی تاراوگە، لە بەردەم باڵوێزخانەکانی ئەمریکا، بەردەوامیی پێ بدەن.
بەخۆشحاڵییەوە، ڕۆڵەکانی نەتەوەی مەزنی کورد لە هەمو پارچەکانی کوردستانی سەدانجار جینۆسایدکراودا، ئەم چەند ڕۆژە ئەوپەڕی لەخۆبردویی خۆیان سەلماندوە. بەتایبەت، باشوری کوردستان بوەتە پشت جەبهەو پشتوپەنای خۆراوای کوردستان.
لەڕاستیش دا گرنگە لە ڕاستگۆییم بەردەوام بم، لەگەڵ ئەوەی سەرکردەکانی پارتیی، ناکۆکیی و ململانێی قوڵیان لەگەڵ پەکەکە هەبوەو هەیە، بەڵام خودی مەسعود بارزانیی ئەم چەند ڕۆژە نەتەوەییانە ڕەفتاری کردوەو، زۆربەی هەڵوێستەکانی ئەم چەند ڕۆژەی بارزانیی بە ئەرێنیی هەڵەسەنگێنم. چونکە شاهید بوین لە ڕۆژانی شانزەی ئۆکتۆبەر سەرکردەکانی یەکێتیی و پەکەکە دەیانوت: ئەم سەردەمە باوی دەوڵەت-نەتەوەو کوردایەتیی نەماوەو، دەورانی "برایەتی گەلان"ە.
خودی قەرەیلان و بایک چەندانجار ڕایاندەگەیاند: دەوڵەت لە باشور و دەستپێکردنەوەی خەباتی پارتیزانیی لە خۆرهەڵات بە مانای ڕوخاندنی ئێرانەو، ئەوە بیرۆکەی ئیمپریالیزمەو ڕێی پێ نادەین، چونکە ئێستا سەردەمی برایەتی گەلانە.
بەڵام دەوران پێی سەلماندن کە ئایدیای "برایەتی گەلان" کە باڵی مەکتەب سیاسیی کۆنی پارتیی بەهۆی هەواڵگری بەریتانیاوە هاوردەی کوردستانیان کرد؛ بیرۆکەیەکی ئیمپریالیستانەی تواندنەوەی کوردە لە دەوڵەتە دەستکردەکانی ئیمپریالیزمی فارس، ئیمپریالیزمی تورک و، ئیمپریالیزمی عەرەب دا.
هیوادارم ئەمریکا بە پشت بەستن بە زانیاری هەواڵگری، پشتی هەسەدەی بەرنەدابێت لەسەر ئەوەی کە ئێران ئەیەوێ لە کاتی لێدانیی دا؛ پەکەکە وەک پەرژینی خۆپارێزی بەکاربێنێ! چونکە سی-ئای-ئەی و مۆساد ڕۆچونەتە ناو تەواوی هێزە کوردییەکانەوە، بە پەکەکە [هەسەدە!]شەوە!
ئەگەرێکی دیکە کە لێرەدا گرنگە ئاماژەیەکی کورتی پێ بدەم، ئەوەیە: هیوادارم دواڕۆژ نەسەلمێ کە پەکەکە [بەڕێکەوتن!!] لەگەڵ ئەردۆگان بەشێکی گرنگی ناوچەکانی خۆراوای کوردستانیان تەسلیم بە چەتەکانی جۆلانیی کردوە!
هەرچەندە دوێنێ لە چاوپێکەوتنێکم لەگەڵ کەی-ئێن-ئێنیش، سوکە ئاماژەیەکم پێ دا، لێرەدا دوبارەی دەکەمەوە، داواکارم: ڕۆشتن بۆ خۆراوایی کوردستان بە شێوازێکی ڕێکخراو بێت و، بەم شێوازە هەڕەمەکییە ڕێگا نەدرێ هەمو جۆرە کەسانێک ڕوی تێ بکەن. چونکە دەکرێ لەو جۆرە کەسانە سیخوڕی ئیتلاعات و میتیشیان تێدا بێ و، زیانیان بۆ کورد بەگشتیی و، خۆراوای کوردستان بەتایبەت، هەبێ!
ڕژێمە داگیرکەرە ئیمپریالیستییەکانی فارس، تورک و، عەرەب، ئەوپەڕی دڕندەو وەحشەتناکن بۆ خوێنمژینی کورد، هیچیان لە ئەویتریان باشتر نین و، هیچیشیان لە دەوڵەتە دروستکراوەکانیان دا ڕازی نین هیچ مافێک بە کورد بدەن! بۆیە نابێت خۆمان بخەینە بەرەی شیعە یان سوننەوە. بەڵکو دەبێت پرسەکەمان ڕەنگدانەوەیەکی ڕزگاریخوازانە [ناسیۆنالیستانە]ی هەبێ و بەس. بەمپێیە دەبێت هەمیشە بڕوا بە هیچ یەک لە داگیرکەرانی کوردستان نەکەین. کەوابو، گرنگە کارێک نەکەن لەبەر ڕقی پیرۆزی کورد لە هەڵوێستەکانی ئەمدواییەی ئەمریکا؛ ئەوا خۆتان یەکلابکەنەوە بۆ ڕژێمی کوردکوژی ئاخوندەکانی ئێران.
چەندین بەڵگەنامەی بەریتانیاو سی-ئای-ئەی دەیسەلمێنن کە ڕژێمی ئێران بە شێوازێکی [ڕێکخراو] لە ڕێی بەکارهێنانی یەکێتییەوە ئەنفالی گەرمیان و کیمیابارانی هەڵەبجەی بەسەر باشوری کوردستان هێناوە.
بەمپێیە، گرنگە کورد بەرخۆدانی یەکگرتوانەو یەکڕیزانەی خۆی بکات. گرنگە بۆ یەک ساتیش ساردنەبینەوە لە هەمو شێوازەکانی خەبات. لەگەڵ ئەوەش دا هەر دەبێت دبلۆماسییەتمان لەگەڵ ئەمریکا بەردەوام بێت، چونکە ڕژێمە ئیمپریالیستییەکانی فارس، تورک و، عەرەب، لە ڕێی سیخوڕەکانیانەوە؛ دەیانەوێت کورد لە دژی ئەمریکا هان بدەن. دەبێت [زۆر!] وریابین ئەوە بە قازانجی ڕژێمە داگیرکەرەکانی کوردستانە.
تەنانەت ڕژێمی ئێران دەیەوێت کوردانی خۆراوا وەک بەرەی خۆی و ڕوسیا نیشان بدات، بۆ ئەوەی ئەمریکا [بەتەواوی!!] دڕندە فاشیستەکانی جۆلانیی-ئەردۆگان دەست کراوە بکات! چونکە لەباربردنی ئەزمونی ڕزگاریخوازی هەر بەشێکی کوردستان؛ بە قازانجی ستراتیژی گشت ڕژێمە داگیرکەرەکانی کوردستانە. ئەوەی تائێستا ئەمریکا کردویەتی دەتوانین لە ڕوی زانستی دبلۆماسییەوە بەو شێوازە هەڵیسەنگێنین، کە: ئەمریکا بەشێوازێکی [ڕێژەیی!] گڵۆپی سەوزی بۆ دڕندە فاشیستەکانی جۆلانیی-ئەردۆگان هەڵکردوە، نەک بەشێوازی [تەواوەتیی!]. پێویستە لە ڕوی دبلۆماسییەوە وریای ئەو شیکردنەوانە بین!
جارێکی دیکە چەندبارەی دەکەمەوە، ئەوەی کورد سەردەخات لەم دۆخە تراژیدییەدا، لە دو هۆکاری سەرەکیی دا کورتی دەکەمەوە:
یەکەم: یەکڕیزی و یەکگوتاریی و یەکهەڵوێستیی هەمو کوردان بەردەوام بێ لە خەباتی ڕزگاریخوازیی، مەدەنیی، سیاسیی و، دبلۆماسیی دا. کە [ڕەخنە!] لە ئەمریکا بگرین، بەڵام نەیکەینە [دوژمن!]ی هیچ بەشێکی کوردستان. چونکە وایدەبینم کە ڕژێمی ئێران نیەتێکی شەیتانانەی فریودەرانەی هەیە کە کورد بخاتە زاوییەیەکەوە کە خۆراوای کوردستان بە دەردی باشوری کوردستان بە ئەنفالکردن بدات. ئێمەی کورد دەبێت لە خۆراوای کوردستان لە بەرگری و هێرشی ڕزگاریخوازانە هەر بەردەوام بین و، بە هیچ جۆرێک تەسلیم نەبین و، لە هیچ دۆخێکیش دا واز لە خەباتی دبلۆماسیی لەگەڵ ئەمریکا نەهێنین!
دووەم: دەبێت ڕۆڵەکانی نەتەوەی مەزنی کورد بە یەک چاو و بە یەک بڕوای نەگۆڕەوە هەڵسەنگاندن بۆ داگیرکەرە ئیمپریالیستەکانی تورک، فارس و، عەرەب، بکەن و، هیچ جیاوزییەک لە نێوانیان دانەنێن. چونکە هەمویان وەک یەک دوژمنی خوێنخۆری نەتەوەی مەزنی کوردن و، هیچیان تۆزقاڵێک لەویتریان باشتر نییەو، تەواو دڕندەن.
دڵنیابن، بە یەکگرتویی و یەکڕیزیی و یەکهتڵوێستیمان، بە وەلانانی ئایدیای هەناردەکراوی "برایەتیی گەلان"ی هەواڵگری بەریتانیی و، هەڵگرتنی دروشمی شۆڕشگێڕانەی: "بەڵێ بۆ ڕزگارکردنی خاکی کوردستان"، لە ئاکام دا، چەندە قوربانییش بدەین؛ هەر سەردەکەوین. چونکە قۆناغی ڕزگاریخوازیی شەرم و ترسی ناوێ، بەڵکو یەکگرتویی و ئیرادەی بەردەوامی دەوێ!