هەفتەیەک زیاترە، هێزه کوردییەکانی نزیک لە ڕژێمی ئێران، بەتایبەت پەکەکەو، بەتایبەتتر ئەو [بەناو] نوسەرو فەیسبوکەوانانەی کە لەگەڵ داگیرکەران دژی ڕیفراندۆمی باشوری کوردستان و دەستپێکردنەوەی خەباتی پارتیزانی خۆرهەڵاتی کوردستان بون، دەستیان داوەتە لێشاویکی توند و بەربڵاوی پڕوپاگەندە دژی ئیسرائیل.
گەلۆ پرسیار ئەوەیە: ئێمەی کورد لە ڕوی نەتەوەییەوە چیمان بەلای ئیسرائیلەوەیە؟
ئایا تورک، فارس و، عەرەبن کە بە زۆر بە تورک-مان دەکەن، بە فارسمان دەکەن، بە عەرەبمان دەکەن و، ئەتکی خوشک و دایکی کورد دەکەن، یان ئیسرائیلییەکانن؟
ئایا تورک، فارس و، عەرەب، نیشتیمانی ئێمەیان داگیرکردوە، یاخود ئیسرائیل خاکی ئێمەی گرتوە؟
لە ڕوی سیاسیی و ستراتیژیشەوە، کە سیاسەت "هەست و دڵداریی نییە" و، بەرژەوەندییە، ئایا ئێمەی کورد هیچ ڕێکەوتنێکی ستراتیژیمان لەگەڵ ئیسرائیل هەیە کە بمانپارێزێت، ئەی ئیتر ئەو پڕوپاگەندە بەربڵاوەی ئێستای بەشێکی کورد لە دژی ئیسرائیل لە چییەوە سەرچاوە دەگرێ!
باشە ئیسرائیل بۆچی خۆی تێوەبگلێنێ و عیلاقەی چییە کە تورک، فارس و، عەرەب، بەردەوام ئێمە جینۆساید دەکەن، لەکاتێکا بەشێکی گەلی کورد، بەتایبەت پەکەکەو هێزە ئیسلامییە سیاسییە کوردییەکان؛ تورک و فارس و عەرەب بە برای کورد دەزانن و، هەمیشەش ئیسرائیل بە دوژمن دادەنێن! ئێ ئیتر بۆچیی و چۆن ئیسرائیل دێت لەسەر کورد بکاتەوە؟ ئەگەر جولەکە وابن؛ چۆن بەم ئاستە لە باڵادەستیی دەگەشتن!؟
ئایا هیچ مانگێک هەبوەو هەیە کە ئۆجەلان و سەرکردەکانی پەکەکە و هێزە ئیسلامییە سیاسییە کوردییەکان وتار و پەیامێکیان لە دژی ئیسرائیل نەدابێ!؟
لەناو سەرکردەکانی کورد؛ کێ هەیە هێندەی ئۆجەلان وتاری دژی ئیسرائیل هەبێ؟!
کێ هەیه هێندەی ئۆجەلان دەیان پەیامی دابێت دژی "دروستبونی دەوڵەتی نەتەوەیی کوردیی" و دژی پلانی ئیسرائیل بۆ دابەشکردنی تورکیا، ئێران، عێراق و، سوریا؟!
کێ هەیە وەک پەکەکە، بەپێی دەیان بەڵگەنامەی بەریتانیی، سەرەتای شەڕەکانیان، وەک سورەی بەرلەشکر، کەوتبنە پێش سوپای فاشیستی حافیز ئەسەد و، لە بەرزاییەکانی جۆلان؛ دەیان ئیسرائیلییان کوشتبێ لە ساڵی ١٩٨٣ دا؟!
با ڕاشکاو بین؛ ئایا هەسەدە [پەکەکە] لە خۆراوای کوردستان هەمیشە لینکی بەهێزیان لەگەڵ ئێران و حەشدی شەعبی هەبوه یان نا!؟
ئایا چەکداربون لە ناو یەکەکانی پەکەکە لە شنگال وەک خزمەت لە ڕیزەکانی حەشدی شەعبی جساب ناکرێ؟
ئێوە پێتان وایە، مۆساد کە نزیکترە لە ڕەگی ملی خامنەییەوە لە خامنەیی؛ هەمو ئەم شتانە نازانێ!؟
واتە: مۆساد نازانێ پەکەکە، یەکگرتو و، کۆمەڵەی ئاخوند عەلی باپیر، سەر بە کێن و چی ئەکەن!؟
ئیتر چۆن و بۆچی ئیسرائیل دێت بەرگری لە کورد بکات، خۆ دنیای سیاسەت؛ بەرژەوەندییە؟
مەگەر "موجاهیدی ژن و ڤێلاو سەرمایە" جەنابی حوجەتولئیسلام ئاخوندەکان نەیانئەقیڕاند: "ڕێگام بۆ بکەنەوە با بڕۆم بۆ جیهادکردن لە دژی ئیسرائیل"!؟
تا کار گەشتە ئەوەی؛ تەواوی سەرکردایەتی پارتیی، بە پیاو و ژنەوە، سیی بە چل تەڵاقیان خوارد؛ چەند پاسێک بۆ خۆیان و بەسیجەکانیان ئامادە بکەن کە بڕوات بۆ جەنگی ئیسرائیل!
لە ڕوی سیاسییشەوە: ئیسرائیل چۆن دێ و، بۆ دێ شەڕ بۆ پەکەکە بکا؟
ئیسرائیلییەکان بەرژەوەندییان لەگەڵ جوڵانەوەکەی مەلا مستەفا یەکی گرتەوەو، هاتن سوپای فاشیستی عەرەبیان تەفنوتونا کرد! بەڵگەنامە بەریتانییەکان دەیسەلمێنن کە سەدانجاریش هاوکاری مرۆیی و پزیشکیی کورد و ئاوارەبوەکانی کوردیان کردوە.
لە دنیای سیاسەت دا؛ لە کاتێکا ئەو دێت هاوکاری سەربازیت بکات کە ڕێکەوتنامەی ستراتیژی لە نێوانتان هەبێت، گەلۆ جگە لە جنێودانی بەردەوامی پەکەکە بە ئیسرائیل و، شەڕکردنی پەکەکە دژی ئیسرائیل؛ چ شتێکی تر پێکیان دەبەستێتەوە؟
مەگەر مەزڵوم عەبدی دەیانجار ڕاینەدەگەیاند، کە: هەڵەی باشوری کوردستان دوبارە ناکەنەوەو، ئەوان فیدراڵیی و ئۆتۆنۆمییان ناوێ و، برایەتیی گەلان لەت ناکەن و، دەچنە ناو سوپای عەرەبیی سوریاوە!؟
مەگەر ساڵی پار لە ڕۆژی ١٠-٣-٢٠٢٥ مەزڵوم عەبدی نەڕۆشت لەگەڵ محمد جۆلانیی ڕێکەوتنامەی ئیمزاکرد کە [تێکەڵ] بە هێزەکانی سوریای عەرەبی دەبن، منیش ڕۆژێک دوای ئەوە، لە بەرواری ١١-٣-٢٠٢٥ لە دژی ئەو خاکفرۆشتنە وەستامەوەو، بەم بابەتەم کە لە وێبسایتی ئاوێنە ماوەو، ئەمە لینکەکەیەتی لە خوارەوە، دەقاودەق نوسیم:
"ئەمەی ئێستا لە ڕێکەوتنی نێوان جۆلانیی-عەبدی ئیمزاکراوە، ئەگەر عەبدی ڕێگا بدات جێبەجێ ببێت: عەبدی لە مێژوی کورددا، لە حەسەن خەیری بەگی دەرسیم، نانیشتیمانیبوونەکەی خراپتر دەبێ.
ڕێکەوتنێک کە دەستەواژەی [کۆنفیدراڵیی، فیدراڵیی، یان ئۆتۆنۆمیی و، خۆسەری]ی بۆ تایبەتمەندێتیی خاک و جوگرافیای [خۆراوای کوردستان] لەخۆنەگرێت، مانای فرۆشتنی خاکی خۆراوای کوردستانە. چونکە پرسی کورد: پرسی خاکی کوردستانە. مانای ئەوەیە: پەکەکە هەستاون فەرمانیان بە مەزڵوم عەبدی کردوە بۆ ئەم هەڕاجفرۆشکردنەی خاکی خۆراوای کوردستان! ئائەمەیە کە لە ٢٠١٤ ەوە لە دەیان بابەتم دا هاوار دەکەم کە ترسناکە پەکەکە بە ئایدۆلۆژیاو عیشقی "برایەتیی گەلان" مامەڵە بە خۆراواو باکوری کوردستانەوە بکا.
ڕێکەوتنێک هێزەکانت تێکەڵ سوپای عەرەبیی سوریی بکەیت! ڕێکەوتنێک کە لە ژێر ئیمزای سەرۆک کۆمارەکەی دا دەستەواژەی [سەرۆک کۆماری "عەرەبیی" سوری]ی بێ!! چۆن تۆی کوردی تێدا ناتوێنرێتەوەو، خاکەکەشت ناکرێتە پارچەیەک لە عەرەباندن!
تەنیا گەرەنتی ئەوەیە: مەزڵوم عەبدی بەفەرمی داوای [کۆنفیدراڵیی، فیدراڵیی، یان ئۆتۆنۆمیی، یاخود خۆسەری]ی بۆ تایبەتمەندێتیی خاک و جوگرافیای [خۆراوای کوردستان] بکات کە ئیمزای ئەمریکاشی وەک نێوەندگیری نێودەوڵەتی تێدابێت و، لە دیفاکتۆش دا بونیەتی حوکمڕانیی و هێزی خۆیان بسەلمێنن. نەک ئەوەی وەک ئۆجەلان داوای برایەتیی گەلان و تێکەڵبون بکات. بێگومان کاتێک کە جۆلانیی بەهێز بو؛ ڕێکەوتنەکە دەچەسپێنێ و، بۆ لایەنی کوردیش دەبێتە خافرۆشیی!". ئەمەش لینکی تەواوی بابەتەکەی پارساڵە:
https://www.awene.com/article?no=23036&auther=1251
کەوابو، ئەو هەڵمەتە پڕوپاگەندەیە دژی ئیسرائیل، کە بۆچی ئیسرائیل بە هانای پەکەکەوە نایەت؛ دەزگاکانی میت و ئیتلاعاتی لە پشتە بۆ ئەوەی کورد لە دژی ئیسرائیل هان بدەن.
دەبێت هەمیشە ئەوە لە وتار و کردەوەمان بچەسپێت، کە: دوژمنی هەمیشەیی ئێمەی کورد؛ ئیمپریالیزمی تورک، ئیمپریالیزمی فارس و، ئیمپریالیزمی عەرەبەو، فەقەت!
بەم پڕوپاگەندەیە لە دژی ئیسرائیل دەیانەوێ لە ڕوی ستراتیژییەوە باشوری کوردستانیش بەم جەنگەوە بگلێنن!! چۆن و بۆچی.....!!! خۆتان لێیوردببنەوە!
لەلایەکی دیکەوە، ئێمە شاهیدین، لە هەمو ڕویەکەوە باشوری کوردستان بەوپەڕی شکۆمەندییەوە حەشر دەکەن دژی تیرۆریستەکانی جۆلانیی، باشە پەکەکە ئەگەر ئێوە بەڵای دەست داگیرکەرانی کوردستان نین بۆ گیانی کورد و تێوەگلانی باشور؛ بۆچی لەم تەوقیتە [زۆر!!] پێویستەدا باکوری کوردستان ناجوڵێنن و ئەردۆگان مێشێک میوانی نییە؟!!
چۆن ئێوە [بە ئاسانیی!] ئەو هەمو ناوچەیەتان بەخێرایی لە دەست دا لە بەرانبەر تیرۆریستەکانی جۆلانیی، لەکاتێکا سەدان هەمەری سەربازیشتان بۆ جێهێڵاون!!
خۆ ئەگەر خۆتان کشابنەوەو بەڕێکەوتن بوبێ؛ ئیتر چۆن سەدان هەمەریان بۆ جێدەهێڵن و، چۆنیش پرۆکسییەکانی تورک هەزاران لاوی کورد لەوێ جینۆساید دەکەن! ئەمە پرۆژەی لە ناوبردنی کوردەو، دەتانەوێ لەم تەوقیتە زێڕینەدا باشوریش تێوەبگلێنن. بەڵام باشور نەتەوەییانە تا ئێستا مامەڵەی کردوەو، ورەی کوردانی خۆراوای بەرزکردەوەو، نەیهێشت بکەون!
بەهەرحاڵ، شیکردنەوەی زیاتری ناوێ؛ دواڕۆژ دەزانن کە ئایدیاکانی ئەم تێفکرینانەم دروست بون یاخود نا!!
با بڕۆینەسەر دۆخی خۆرهەڵاتی کوردستان کە ئێستا لە ژێر زنجیرەیەک جینۆسایدی فارسی ئیمپریاڵیست دایە!
ئەو خۆرهەڵاتی کوردستانەی هەمیشە فریادڕەسی گشت پارچەکانی کوردستان بوه؛ بێکەسە!
ئەو خۆرهەڵاتی کوردستانەی کە داینەمۆی هەمیشەیی کلتوری کوردەوارییەو، لە وێوە وەک مەکینەی بەرهەمهێن بەردەوام شوناس و ڕەسەنێتیی کلتوری کوردەواریی هەناردەی بەشەکانی کوردستانی براکانی کردوە بۆ شتنەوەی سیاسەتی فاشیستانەی تەفریس و، تەعریب و، تەتریک، کەچی ئێستا بێ برایە!
خۆرهەڵاتی کوردستانی خاوەن ئازاترین شێرەکوڕانی ناو مێژوی کورد، وەک؛ سمکۆی شکاک کە لە نەعرەکەی بینینی دا، ڕەزا شا شەوان دەلەرزیی و خەوی لێنەدەکەوت و، توشی نەخۆشیی [ترسی خەولێنەکەوتن] بویەوە، هەتاکو بە پیلان سمکۆی تیرۆر نەکرد، نەهاتەوە سەر خۆی.
خۆرهەڵاتی کوردستانی خاوەن مەحمود خانی دزڵی کە گەشتە فریای شێخ مەحمود.
خۆرهەڵاتی کوردستان: داهێنەری وشەی [پێشمەرگە] و سوپای پێشمەرگە لە کۆماری کوردستان دا.
ئەو خۆرهەڵاتی کوردستانەی، سەرەڕای تیرۆرکردن و شەهیدکردنی دەیانی وەک: سەدیقی ئەنجیری و، سولەیمانی موعێنیی؛ بەڵام بیری نەتەوەییان لەوپەڕی شەرەفمەندی دا، بە هەزارانیان شکۆمەندی خۆیان سەلماند و، ڕێزلێگرتن و بەخێرهاتنیان لە تەرمی مستەفا بارزانیی، کرد. با ئەوەش بوەستێ کە پێشتر هەر خۆرهەڵاتییەکان بون گەشتنە فریای مەلا مستەفای بارزانیی، کاتێک کە باڵی مەکتەب سیاسیی و، ئێران و، ناسریی و بەعسییەکانی عێراق و، بەریتانییەکان، پلانی سڕینەوەی مەلامستەفا و بزوتنەوەی نەتەوەیی کوردیان دا لە ساڵی ١٩٦٣ داڕشت و گرتەبەر.
خۆرهەڵاتی کوردستانی خاوەن زیرەکترین ڕێبەری دبلۆماسیی کورد، قاسملو؛ کە بە پیلان تیرۆرکرا. ئەو قاسملووەی بەپێی دەیان بەڵگەنامەی نهێنیی بەریتانیی، لە نێوان ساڵانی ١٩٨٠ هەتا ساڵی ١٩٨٥؛ دەیان جار ڕێی لە جەلال تاڵەبانیی گرتوە کە هێزەکانی یەکێتیی تێکەڵ بە سوپای پاسداران بکات و، پێی وتوە: "نابێت خەباتی کورد تێکەڵ بە جەنگی هەزاران ساڵەی نێوان عەرەب و فارس و، سوننە و شیعە، بکرێ. بەو کارە سوپای بەعس سەدان قەسابخانە بۆ گەللی کورد لە باشوری کوردستان دەخەنەگەڕ. خەباتی ئێمەی کورد بۆ ڕزگاری نیشتیمانە، نەک بۆ دوژمنایەتیی!".
ئەو خۆرهەڵاتی کوردستانەی کە خانو و ماڵەکانیان بە هەڵەبجەییە کیمیاویلێدراوەکان و ئەنفالکراوانی باشور، بەخشی!
خۆرهەڵاتی کوردستانی داینەمۆی زمانزانانی زمانی کوردیی و، هۆنەر و، هونەری کوردیی.
ئەو خۆرهەڵاتی کوردستانەی کە بونە فریادڕەسی باشور لە قاتوقڕیی و گەمارۆ ئابورییەکەی ساڵانی نەوەدەکانی باشوری کوردستان دا.
ئەو خۆرهەڵاتی کوردستانەی، سەرەڕای ئەوەی چەندان جار سوپای پاسداران برانە سەر بارەگای حیزبەکانیان و، بە تێوەگلانی یەکێتیی بە تایبەت و، تەنانەت پارتیی و حەرەکەی ئیسلامییش؛ دەیان لە سەرکردەو سەدان لە فەرماندەو پێشمەرگەکانیان تیرۆر کران. بەڵام هەستی پاکی ئەوان هێندە ساددەو پاکژ بو؛ ئاهەنگیان بۆ بونە سەرۆککۆماری جەلال تاڵەبانیی دەگێڕا. کە تاڵەبانیی؛ حکومەتی عێراقی-عەرەبیی بۆ گیانی کورد دروست کردەوەو، کەرکوکی قیبلەی نەتەوەیی کوردی بە یەکسانی دابەشکرد بەسەر کوردی خانەخوێ و، عەرەبی داگیرکەر و، تورکمانی ئیمپریالیست دا. تا ئێستاش چەندان سیاسەتمەداری ئەوکاتی ئەمریکا ڕایانگەیاندوە: "جەلال تاڵەبانیی تاکە دەرچە بو کە لەڕێی پێدانی سەرۆککۆماری به ئەو؛ توانیمان ئاستی داخوازییە نەتەوەییەکانی هەرێمه کوردییەکەی عێراق بەرانبەر بە حکومەتی بەغدا؛ دابەزێنین!".
ئەو خۆرهەڵاتی کوردستانەی، کە لە خراپترین دۆخی ئابوری دا، دەیانتوانی وەک چۆن بەشێکی گەورە لە سەرۆک هۆزەکانی باشور بونە جاش و موستەشاری بەعس و، وەک ئەوانەی باکوریش کە بەشێکیان بونەتە گزیری هەمیشەیی میت، ئەوانیش ببنە نۆکەری ئیتلاعات و سەروەت و سامانیان دەست کەوێ. بەڵام ئەوپەڕی ژیانی شەرەفمەندانەیان هەڵبژارد، کە سەخترین ژیانی شکۆمەندانەیەو، تەنیا بەو مرۆڤە ئاست باڵایانە دەکرێ وەک هەڵۆ دەژین، ئەویش؛ ژیانی کۆڵبەرییە بە ناو تولەڕێی دوندە سەرکەشە پڕ لە مین[ئەڵغامەکان]دا. بێگومان ئەوە تەنیا بەوانە دەکرێ کە لە لوتکەی شەرەف و کەرامەت و ئیرادە دان. ئەوانە شابازەکانی دوندەکانی زنجیرە شاخەکانی زاگرۆسی کوردستانن.
ئەو خۆرهەڵاتی کوردستانەی کە خاوەنی سەدان شەهیدە لە خەبات بۆ ڕزگاریی پارچەکانی تری کوردستان، وەک شەهید موسا کۆبانێ، کەچی دەمێکە کەناڵە تەلەفزیۆنەکانی براکانیی، ئامادە نین بە هەواڵێکی ساکاریش باس لەم زنجیرە ترسناکە جینۆسایدە بکەن کە مانگێکە ڕژێمی داگیرکەری فارسی ئیمپریالیست بەشێوەیەکی [ڕێکخراو] بۆ پاکتاوکردنی کورد ئەنجامی دەدات.
جینۆسایدی ڕژێمی داگیرکەری فارسی ئیمپریالیست لە خۆرهەڵاتی کوردستان، بە شێوازێکە کە بە دەیان جۆر چەک، تەنانەت چەکی تاپڕیش، بەئاشکرا تەقە لە ناو ماڵەکانی شار و شارۆچکەکانی خۆرهەڵاتی کوردستان دەکەن. بە جۆرێک هەزاران مناڵی خوار تەمەن چواردە ساڵ ئەنجن ئەنجن بون بەهۆی ڕێژنەی فیشەکی بیکەیسیی و تاپڕەوە لە ناو ماڵەکان دا، کە وێنەی سەدان مناڵی وەک تاهیر مەلەکشایی، تەمەن دوانزە ساڵی خەڵکی قوروە دنیای هەژاندوە، کەچی لەم ڕووەوه کەناڵە تەلەفزیۆنییەکانی باشوری کوردستان؛ مێشێک میوانیان نییە!!
لەم زنجیرە پاکتاوکردنەی نەتەوەی کورد لە خۆرهەڵاتی کوردستان کە سیاسەتی جینۆسایدێکی ڕێکخراوو ئۆرگەنایزی ڕژێمی فارسی داگیرکەرە بۆ سڕینەوەی ڕەگەزی کورد، هەزاران ڕۆڵەی نەتەوەی مەزنی کوردی ڕەگەز زاگرۆسیی لە کرماشان و ئیلام و لوڕستانی کوردەواریی شەهید کراون. هەندێک لە شەهیدەکان، چیرۆکەکانیان هێندە تراژیدین، مرۆڤ جگە لە ئامانجی [تۆڵەسەندنەوە]، هیچ ئامانجێکی تر کەمێک سوکنایی بۆ دەرونیی ناگەڕێنێتەوە. بۆ نمونە؛ لە زنجیرەی سیاسەتی جینۆسایدی ڕژێمی فارس دژی نەتەوەی کورد بەگشتیی و، هۆزی شۆڕشگێڕی تاوگۆزی بەتایبەت، لە کاتێک دا کە دانیشتوانی کرماشانی پایتەختی خۆرهەڵاتی کوردستان، وەک تەواوی خۆرهەڵاتی کوردستان، لە دژی ڕژێمی کوردکوژی داگیرکەری فارسی ئیمپریالست لە ڕاپەڕینی ڕاماڵێنەر دان، گەلە پاسدارێکی تیرۆریست، لەوپەڕی فاشیستیی و دڕندەبون دا، بەناو شاری کرماشان دەگەڕێن و، تەقە لە ناو ماڵەکان دەکەن.
لەو ڕەشەکوژییە فاشیستانەیەدا، شەهلا کاکایی تاوگۆزی، خەڵکی گوندی قەڵاجێی تاوگۆزی لە خۆرهەڵاتی کوردستان، خۆی و هاوسەرەکەی لە ماڵەکەی خۆی لە شاری کرماشان، دەدرێنەبەر ڕێژنەی فیشەکی پاسدارە ترسنۆکەکانی خامنەیی، کە زەندەقیان لە ئیسرائیل چوە.
بەو هۆیەوە، شەهلا تاوگۆزی شەهید دەکەن و، هاوسەرەکەشی کە ناوی خەبات تاوگۆزی بوە، کە ئامۆزای خۆی بوە؛ بریندار دەبێ.
پاش گەڕانەوەی [خەبات تاوگۆزی] لە نەخۆشخانە، کاتێک دەزانێ شەهلای هاوژینی شەهید بوە؛ ئەویش خۆی دەکوژێ!
بەدڵنیاییەوە گەللی کورد، وەک مەزنترین نەتەوەی شۆڕشگێڕ، بەوپەڕی شکۆوە نیشتیمانەکەی ڕزگار و ئازاد دەکات. نەمان بۆ داگیرکەرە ترسنۆکەکانی ئیمپریالیزمی فارس، ئیمپریالیزمی عەرەب و، ئیمپریالیزمی تورک، بەسەر خاکی پیرۆزی کوردستان.
سڵاو بۆ گیانی پاکی شەهیدانی هەر چوار پارچەی کوردستانی داگیرکراوی سەدانجار جینۆسایدکراو.
سڵاو بۆ ڕۆحی بەرز و پیرۆزی شەهلا تاوگۆزی و، خەبات تاوگۆزیی و، تەواوی شەهیدانی ئەم دواییەی خۆرهەڵات و خۆراوای کوردستان.
کوردبون: شەرەفە، کەرامەتە، ئیمانە، دیندارییە، ئەخلاقه، ڕەوشتە، لوتکەی مەردێتییە.
جاشبون و ترسان لە داگیرکەران و گەندەڵبون و پلەپەرستی: ئەوپەڕی بێشەرەفییە!