دکتۆرا لە دبلۆماسیەتی نێودەوڵەتی بەریتانیی
پێرێ، هەر کە ئەمریکا+ئیسرائیل هێرشیان کردەسەر خامنەیی، مۆساد لەڕێی تیمە ڕوێنراوەکانیان لە ناو فەرماندەکانی سوپای پاسدارانەوە ئاڕاستەی هێرشەکانیان لە ڕوکردنە ئیسرائیلەوە گۆڕی بۆ وڵاتانی کەنداوی عەرەب. بەوە؛ فەرەنسا+ئەڵمانیا+بەریتانیاو وڵاتانی کەنداو ناچار دەبن لە ڕوی ئابوریی، یان سەربازیی، یاخود هەواڵگریی و سەربازیی، بەشداری جەنگەکە بن!
واتە: خۆلادان لەو جەنگە کە بەرۆکیانی گرتوە، هەم شکۆی وڵاتانی عەرەب دادەڕمێنێ و، هەم ئەگەریشی هەیە ئەمریکا+ئیسرائیل جەنگەکە (کە سەرەتا وتیان: تەنیا چوار ڕۆژ دەخایەنێ) بۆ چەندین هەفتە درێژ بکەنەوە تاوەکو وڵاتانی کەنداو ناچار بە سەرانەلێسەندنی زیاتر و بەشداری دەکەن!
ڕەنگە هەندێ کەس بڵێن: ئاخر ئەم جۆرە موشەکانە تەنیا هەتاکو وڵاتانی عەرەب بڕدەکەن! بەڵام خۆ عەقڵی سەلیم؛ دنیا ناکاتە دوژمنی خۆی، لە پێویستترین دۆخ دا کە ئەم دۆخی خۆ-کەرکردنەی ڕژێمی ئێرانە! بۆیە، ئەوە لێوەشاوەیی مۆسادە کە ئاوا لە گرتنە ئامانجی ئیسرائیلەوە، قەرەوڵی پاسداران ڕووەو وڵاتانی کەنداوی عەرەب دەگۆڕێ!
لە بابەتی بەڵگەنامەکانی سی-ئای-ئەی دا: "چۆن ئەفسەرانی ئیتلاعات لەڕێی مۆسادەوە موشەکی دژە تانکو دژە فڕۆکەو چەکی قورسیان لەلایەن سی-ئای-ئەیەوە پێدرا!؟"، کە لە ئاوێنە بڵاوم کردەوە. ئەوە لە چەندین بەڵگەنامەی سی-ئای-ئەیەوە سەلما: دەزگای ئیتلاعات کە هەمان دەزگای ساواک بوەو ناوەکەی گۆڕاوە؛ بەشێکیان بەنهێنیی هەر ئیش بۆ مۆساد دەکەن. چونکە هەمان دامەزراوەی ساواکن و، تەنیا ناوەکەیان گۆڕدراوە.
یەکێکی تر لە گرنگییەکانی ئەو بابەتە بەڵگەنامەییە ئەوەبو، کە چۆن سی-ئای-ئەی زانیویەتی: مەنوچەر قوربانیفەڕ مۆرەی چەند سەرەی سیخوڕییە. بە جۆرێک ئیتلاعات ڕایانسپاردبو کە ڕاپۆرتی سەرنجڕاکێش بداتە سی-ئای-ئەی کە دەقاودەق لە بەڵگەنامەکان دا هاتبو:
"قوربانیفەڕ لە مانگی یەکی ساڵی ١٩٨٠ەوە پەیوەندی بە سی-ئای-ئەیەوە کردو، بو بە ئەندامی بەشی ڕاپۆرتپێدان بە سی-ئای-ئەی. ئەوەی تێبینیمان کرد: "قوربانیفەڕ جار جار ڕاپۆرتی گوماناویی و سەرچاوە نادیاری بەسودی دەنارد! زانیارییەکانی ناو ڕاپۆرتەکانی زۆر لێزانانە پێکەوەی دەگونجاندن؛ بە جۆرێ هەم سەرنجڕاکێش بو بۆ ئێمەو، هەمیش لە سەدا بیستی زانیارییەکانی ناو ڕاپۆرتەکانی ڕاستبون و، لە سەدا هەشتای ناوەڕۆکەکانیشی درۆو فریدەرانەو تەڵەکەبازیی بو".
مەبەستم ئەوەیە: وردبنەوە لە (بەناو!) شرۆڤەکارانی سەر کەناڵەکانی هەرێمی کوردستان، زۆربەیان لێزانانە لە ژێر ناوی شیکاری دا؛ نیوەی قسەکانیان ڕاست دەڵێن و، بەشەکەی تری وتەکانیان [بە پیلانەوە!] یان بە سودی ئێرانە، یاخود بە قازانجی وڵاتانی تورکیاو کەنداوی عەرەبیی. ئەمەش سەلمێنەری ئەوەیە: چۆن ئەو وڵاتانە کاریگەرییان هەبوە لە ڕواندنی کەسانی سیخوڕ لە ناو سیاسییەکان، میدیاکاران، شرۆڤاکاران و، مامۆستاکانی زانکۆکانی باشوری کوردستان دا.
ڕەهەندێکی تری گرنگی ئەو بابەتەی بەڵگەنامەکانی سی-ئای-ئەی ئەو شیکارییە بو کە لەسەر [جیۆپۆلەتیکی ئێران] هەڵسەنگاندنیان بۆ کردبو، کە یەکێکە لە گرنگترین جیۆپۆلەتیکەکان لە ئاستی جیهان داو، ئەگەر ببێتە هاوپەیمانی ئەمریکا دەتوانێ لە جەمسەرە دورەکانی جیهانییش دا پاسەوانی بەرژەوەندییەکانی ئەمریکا بێت.
بۆیە، دیسانەوە وەک لە بابەتەکانی پێشوم هۆکارەکانیم شیکردەوە، جەخت دەکەمەوە، ئەوانەی پێیانوایە: ئێران بە ڕێکەوتنی (سەفوانی دوەم) دەتوانێ سیستەمەکەی بهێڵێتەوە؛ ستراتیژزان نین و، گەمژەی سیاسیین. چونکە گەر ئاگربەستی کاتیی (هودنە)ش لەگەڵ ئێران بکرێ؛ هەر ماوەیەکی کاتیی دەخایەنێت و، [ستراتیژی نەگۆڕ]ی ئەمریکا-ئیسرائیل ڕوخاندنی ئەم ڕژێمەیە!
کورد دەبێ هەم لە خۆرهەڵات و، هەمیش لە باشوری کوردستان ئامادەبێ و، دەرفەتەکان لە کاتی خۆیدا بقۆزێتەوە! ئەگینا ئەگەر دەرفەتەکان لەدەست بدرێ؛ ڕێک پێچەوانە دەبێتەوە بەتایبەت بۆ باشوری کوردستان! چونکە کاتێک دەسەڵاتێک لە ئێران بێتەسەرکار کە هاوپەیمانی ستراتیژی ئەمریکا-ئیسرائیل بێ؛ ئیتر پێگەی باشوری کوردستان بۆ ئیسرائیل-ئەمریکا ئەو گرنگییەی نامێنێ!
پرسی گرنگی جیۆپۆلەتیکی ئێران، بە جۆرێکە تەنیا یەک پارێزگای وەک تارانی ئێران؛ هێندەی ئیسرائیلە. لە ڕوی مرۆڤیشەوە؛ بە (تەنیا تاران) و بە (هەمو ئیسرائیلەوە) بە نزیکەی یەکی دە ملیۆن مرۆڤن!
واتە: چی؟ بە مانای ئەوەی؛ هەم ئیسرائیل و، هەمیش زۆرینەی وڵاتە عەرەبییەکانی کەنداو، هەریەکەیان بەنزیکەی به قەد یەک پارێزگای ئێران دەبن؛ هێندە ئێران بەرفراوانەو، جیۆپۆلەتیکیشی گرنگە! کەوایە، ئێرانیش دەبێ بتوانێ بەرگری بکا. بەڵام دەرەنجام هەر خاپوری دەکەن!
بەپێچەوانەی تەواوی شرۆڤەکارانی کوردیشەوە، پێموایە: گەر ئاگربەستی کاتییش بێتەکایەوە هەر ئەم جەنگە درێژە دەکێشێ و، درێژەکێشانی جەنگەکەش بە سودی کوردە بە مەرجێ لە تەوقیتەکان دا دەرفەتەکان بقۆزێتەوە.
خاڵێکی گرنگی تر، تەنسیقی [تەواوەتی]ی خودی نەتەنیاهۆ و دەزگای مۆسادە. سەرکردە هەبوە لە وڵاتانی جیهان کە هەم تەنسیقی لەگەڵ دەزگا هەواڵگرییەکەی حکومەتەکەی بە پێی پێویست نەبوەو، هەمیش هەبوە دەزگا هەواڵگرییەکەی ڕاپۆرتی خوێندنەوەی هەڵەیان بە سەرکردەکەیان داوەو، بەلاڕێیان بردوە، وەکو دەزگا هەواڵگرییەکانی ئەو وڵاتە عەرەبییانەی کە [بەهاری عەرەبی]ی گرتنییەوەو، ڕاپۆرتە هەڵبەستراوەکانی دەزگای زانیاریی و پاراستن دژی نوسەرانی نیشتیمانپەروەر و ئازادیخواز و وەلانانی تەرکیزیان لەسەر کەسانی سەر بە داگیرکەران.
بەڵام بە پێچەوانەوە، مۆساد تەواوی تەرکیزی لەسەر [بەرژەوەندی گشتی]ی ئیسرائیلییەکانەو، نەتەنیاهۆش بۆ بەرژەوەندی ئیسرائیلییەکان سەرکردەیەکی بێ وێنەیە. بە جۆرێ پێموایە: نەتەنیاهۆ لە باوکە دامەزرێنەرەکانی ئیسرائیل و، خودی بنگۆرینیش؛ لێوەشاوەتر نەبێ، لاوازتر نییە!
سەرکردەی هەڵکەوتوی وڵاتان بۆ بەرژەوەندی گشتی گەلەکانیان ئاوان و، سەرکردەکانی کوردیش وەک لە بەڵگەنامە نهێنییەکانی بەریتانیا کە کاتی خۆی بڵاومکردەوە، هاتبو: "مەسعود بارزانیی و جەلال تاڵەبانیی و نەوشیروان مستەفا لێبوردنی گشتییان بەخشییە ئەو دەیان هەزاران ئەفسەر و سەربازەی سوپاکانی سەددام کە پرۆسەکانی ئەنفال و کیمیابارانی نەتەوەکەیانی کردوە. ئەمە لە مێژوی هیچ گەلێک دا نەبینراوه کە سەرکردەکانی لەپێناو کێبرکێیان بۆ خۆبردنە پێشەوە لای سەددام؛ بەم کارە هەستن. لە کاتێکدا هەمان ئەم سەرکردانە بەوپەڕی دڕندەییەوە جەنگی یەکتر دەکەن و، ڕۆڵەکانی نەتەوە خوێناوییەکەیان لەناو دەبەن تەنیا لە پێناو ئامانجەکانی گروپەکانیان و خودی خۆیان".
کەوابو، زۆر گرنگە سەرکردەکانی هێزەکانی خۆرهەڵاتی کوردستان، بەوردی توانای مۆساد-ئیسرائیل و ئەمریکا لە ناو ئێرانی داهاتوش بخوێننەوەو، بزانن چۆن هەنگاو دەنێن و، لەپێناو بەرژەوەندییە خودییەکانیان لە خۆیانەوە لێبوردنی گشتی دەرنەکەن!!
ئەم جەنگە کاتیی دەوێ و، دابارینی ئەمریکا-ئیسرائیل دەبێتە نیعمەتێکی گرنگ بۆ کورد [بە مەرجێ!] گەر دەرفەتەکە، لە کاتی خۆی دا بقۆزنەوە. ئەگینا هێندە جیۆپۆلەتیکی ئێران گرنگە؛ کاتێک حکومەتێکی هاوپەیمانی ستراتیژی ئەمریکا-ئیسرائیل لە تاران هاتەسەرکار؛ ئیتر کورد بەگشتیی و، بەتایبەت خۆرهەڵات و باشوری کوردستان ئەو گرنگییەی بۆ ئیسرائیل-ئەمریکا نامێنێت.
کەوایە، باوباپیرانی کورد زۆر عاقڵمەندانە وتویانە: "دەرفەت نەیبڕی؛ دەتبڕێ!". واتە: هەل و دەرفەت گەر نەیقۆزیتەوە، دەتقۆزێتەوەو، دەتکاتە؛ پەشمەک!
کاتێک دەڵێم: دەرفەتەکە لە تەوقیتی خۆیدا بەباشیی بقۆزرێتەوە، واتە: "کرماشان، ئیلام، هەمەدان، لوڕستانی کوردەواریی و، ورمێ"ی خۆرهەڵاتی کوردستان ڕزگار بکرێ و، کۆنترۆڵ بێ و لە ژێر [دەسەڵات!] و سنوری جوگرافیی [کورد] دا بمێنێتەوە. ئەگینا خۆرهەڵاتی کوردستان نابێ تەنیا بریتی بێ: لە چەند شارۆچکەیەک بە بێ "کرماشان، ئیلام، هەمەدان، لوڕستانی کوردەواریی و، ورمێ"ی خۆرهەڵاتی کوردستان.