دکتۆرا لە دبلۆماسیەتی نێودەوڵەتی بەریتانیی.
بۆچونی خۆمم لەگەڵ دو پڕۆفیسۆری هاوڕێم گۆڕییەوە، هەردوکیان ئەمریکیین و، یەکێکیان جوی ئەمریکییە، لەسەر ئەم دۆخە.
من پێشتر توێژینەوەیەکم لەگەڵ یەکێکیان ئەنجام داوەو، ئەوی تریشیان لە دامەزراوەی بڕیاردانەوە نزیکە.
هەردوکیان بۆچونیان ئاوهابو لەسەر ئەم ئۆپەراسیۆنەی ئەمریکا-ئیسرائیل بۆ سەر ئێران:
١-ئەمریکا؛ ستراتیژی زاڵبون بەسەر نەوت و گازی جیهان، بەتایبەت هی خۆرهەڵاتیی ناوەڕاست و، ڕێڕەوە بازرگانییەکان، جێبەجێ دەکات.
٢-هیج هەڕەشەیەکی ستراتیژیی بۆ سەر ئیسرائیل لە خۆرهەڵاتی ناوەڕاست ناهێڵن [ئەم ستراتیژە کاتی دەوێت!].
٣-تەنیا کێشەی ستراتیژداڕێژەرانی ئەمریکا ئەوەیە: زۆرینەی خەڵکی ئەمریکا دژی جەنگن. بەڵام بەرژەوەندییە جیهانخوازییەکانی ئەمریکا؛ لە پێش هەمو شتێکەوەیە.
٤-تێگەیشتن لە سیاسەتی کورد لای سیاسەتداڕێژەرانی میللەتانی جیهان، ئەوەیە: "کورد گەلێکە لە مێژویانەوە بەکارهێنراون و، بەردەوام بە ئاسانییش دەتوانرێت بەکاربهێنرێن بەتایبەت لەلایەن داگیرکەرەکانیانەوەو، تا ئەندازەیەک لەلایەن زلهێزەکانیشەوە".
ئامۆژگاریمان بۆ کورد وەکو گەلێکی زیندوی داگیرکراو ئەوەیە: "هەر هەنگاوێک بیگرنەبەر با تەنیا لە پێناو ڕزگارکردنی نیشتیمانەکەیان و بەرژەوەندی گشتیی نەتەوەکەیان بێت، نەک هەنگاوێکی کورد بەکوشتدان بنێن لە پێناو بەرژەوەندی سەرکردەو حیزب و سەرۆک هۆزەکانیان".
لە کۆتاییدا، یەکێکیان نوسیویەتی: شەریف وەرە با توێژینەوەیک بکەین و، خۆت بە توێژینەوەوە سەرقاڵ بکە!
[منیش ئەوەی سەرەوەم؛ دەقاودەق بە ئەمانەتەوە وەرگێڕا بۆ نەتەوەکەم].
پرسیارێکیشم لێکراوە با بەئاشکرا بۆچونی خۆمی لەسەر بخەمەڕو: ئایا ئەم جەنگە درێژە دەکێشێت و، دۆخی هەرێمی کوردستان چۆن دەبینیت!؟
وەڵام: زۆرجار، بە چاوپێکەوتن و، بە نوسیم پرسی ئەم جەنگەم؛ شیمکردۆتەوە.
ستراتیژی ئەمریکا-ئیسرائیل؛ ڕوخاندنی ئەم ڕژێمەی ئێرانە.
ساڵی پاریش لە دوای جەنگی دوانزە ڕۆژە وتم: "تاکتیکێکی جەنگەکەی ئیسرائیل-ئەمریکا ڕۆشتۆتە پێشەوەو، جەنگەکە تا پێکانی ستراتیژ هەر قۆناغ بە قۆناغ دەستپێدەکاتەوە".
ئێستاش دەڵێم: "ئەگەر ئەم چرکەیەش ڕێکەوتن بکەن، هەر تاکتیکییە و کاتییەو، جەنگەکە تا پێکانی ستراتیژی ئەمریکا-ئیسرائیل بەردەوامیی دەبێت".
ڕاستگۆییم دەپارێزم و، پێموایە: بۆ ئەم تەوقیتە دۆخی باشوری کوردستان بە [باش!] دەزانم.
بەڵام تێفکرینم ئەوەش پێشبینی دەکات: ئەگەری سەختتربونی دۆخەکەو، هاتنی لێشاوی ئاوارەش هەیە؛ بەمەرجێ جەنگەکە گشتگیرتر ناوخۆی ئێران بگرێتەوە!
گەر دۆخی باشوری کوردستان ئاوا بێت؛ خراپ نییە!
بەڵام، دوای ڕوخاندنی ئەم ڕژێمەی ئێران [کەی دێتە دی؛ ئەوە مەسەلەیەکی ترە]؛ ئەوکات دۆخی کورد بەگشتیی و، بەتایبەت زروفی باشور و خۆرهەڵاتیی کوردستان باشترین دەبێت!
ئەزانم بەهۆی حیزبایەتیی و ناوچەگەرایی نەفرەتییەوە؛ تاکەکانی نەتەوەکەمان لەم زروفەدا بەجۆرێ پەروەردە کراون تەنیا بیر لە بەرژەوەندییەکانی خودی خۆیان بکەنەوە. بەڵام دەمێکە تێفکرینەکانم دەخەمەڕو، دەبو هێزە سیاسییەکانی نەتەوەی کورد لە پێناو؛ [بەرژەوەندی گشتیی نەتەوەی کورد و، خاکی کوردستان] ئیشیان لەسەر بکردبایە، کە یەکێک لەوانە؛ پرسی یەگرتنەوەی کورد و لوڕە!
پێموایە: هەرچەندە درەنگە، دەبو زوتر کاری لەسەر کرابایە. بەڵام دەکرێ هەم کەمپەینیی یەکڕیزبونەوەی کورد-لوڕ ڕابگەیەنرێ و، هەم بیر لەو ستراتیژەش بکرێتەوە، کە چۆن کورد و لوڕ یەکانگیردەکرێنەوە!
کورد و لوڕ یەک ڕەگەزی زاگرۆسیین، لە ئەزەل و دروستبونەوە تەنیا نەتەوەن کە بەجێگیریی خاوەنداری زاگرۆسن و، بە کۆچ نەهاتونەتە ناوچەکەوە. هەم لوڕ بەشێکە لە کورد، هەمیش ئەگەر ئەوان بشڵێن: "کوردیش بەشێکە لە لوڕ" دەبێ بڵێین؛ با وابێ! ئەوەش هەر بەقازانجی [هەمیشەیی] کورد و لوڕە. مێژوی دێرینمان؛ هاوبەش و هاو شارستانیەت و هاوخوێنییە!
بەهیوام؛ هەم کەمپەین و، هەم ستراتیژی یەکخستنەوەی تەنیا نەتەوەی زاگرۆسیی [کورد-لوڕ] بخرێتەکارو، لەو پێناوە پەیوەندی بە چالاکوانانیان، سەرۆک هۆزەکانیان و، کەسایەتییەکانیان بکرێت. بە یەکگرتنەوەمان؛ دەبینەوە نەتەوە بەهێزەکەی مێژوی دێرین و، لە ڕوی ئابوریشەوە؛ بەرژەوەندی تاک بە تاکمان بەدیدێنین و، سودمەندترین نەتەوەی داهاتوی ناوچەکە دەبین و، ڕۆڵەکانمان [پشو]ی هەمیشەیی دەدەن!
ئەم پرۆسەی [بونەوە بە یەک!]؛ سەختیی لە بەردەم دایەو، [کات]یشی پێویستەو، [زۆر!!!]یش نەفەس درێژی دەوێت.
بەڵام دەبێ یەکگرتنەوەو بونەوە بە [یەک]ی کورد-لوڕ وەک [پرۆسە]یەکی مومکین چاولێبکەین و، هەنگاوی بۆ بنێین. ئەوەش سەرەتا لە گفتوگۆو تێگەیشتن لە بۆچونەکانی یەکتر بەتایبەت هی ئەو نوخبەو کەسایەتیانەی کە دەتوانن تێفکرینەکانیان کاریگەر دانەربن لەسەر "یەکڕیزبونەوە، بەردەوام هاندانی یەکانگیربونەوەی کلتوریی نێوان کورد-لوڕ، سڕینەوەی سیاسەتەکانی دابەشکردنمان و، بەردەوامیدان به گفتوگۆی ئەرێنیی و کراوە لەسەر ئەو فاکتەی کە کورد-لوڕ؛ یەک ڕەگەز و یەک نەتەوەی [زاگرۆسی]ین".
وەک خزمەتکارێکی خۆبەخشی نەتەوە زاگرۆسییەکەم، گرنگترینە بەلامەوە؛ نەتەوەکەم قۆناغی "یاریپێکراو" تێپەڕێنێ و، ببێتە "یاریکەر" لە هاوکێشەکانی ناوچەکەدا. بۆیەشە هەمیشە تێفکرینەکانم لەو سۆنگەیەوە بوەو، بەرژەوەندییە خودییەکانمم وەلاناوە. گرنگترینە ڕەگەزە خاوەندارە هەمیشەییەکانی زاگرۆس کە کورد و لوڕن، کە یەک خوێنن؛ بڕژێنەوە یەک جەستەوە.