دکتۆرا لە دبلۆماسیەتی نێودەوڵەتی بەریتانیی
لەگەڵ وەستاندنی-کاتیی هێرشەکانی ئەمریکا بۆ سەر ئێران، تا ئەم ساتە، ئەمریکا نەوەد فڕۆکەی سوتەمەنیی ئاسمانیی و، فەوجێکی تەواو فڕۆکەی شەڕکەری بردۆتە ئیسرائیل. لەگەڵ ئەوانەش دا؛ فڕۆکە ستراتیژی و بۆمبهاوێژەکانی بی ١ و بی ٢ و بی ٥٢ بەتەواوی ئامادەن لە ناوچەکەداو، فڕۆکە ئەمریکییەکان وەک پردێکی ئاسمانیی بەتەواوی بەسەر ئاسمانی خۆرهەڵاتیی ناوەڕاست زاڵبون و، بەردەوام تەقەمەنیی بۆ ئیسرائیل دەگوازنەوە.
ئەوەش فێڵ و چاوبەستنە؛ گوایە ئەمریکا موشەکی کەمی ماوە! ئەمریکا دەتوانێ لە یەک کات دا؛ لە چەندین بەرەی جیهانییەوە جەنگ بکات. هەرئەوەشە وایکردوە؛ زلهێزترین بێت!
ئەمریکا چاوەڕوانی تەسلیمبونی ئێرانە لە گەروی هورمز، ئەگەر نا: ئەیکێڵێ! چونکە لەگەڵ ئەوەی ئەمریکا گورزی کەمەرشکێنی سراواندۆتە هێزی ئاسمانیی و دەریایی و سەرکردەکانی ئێران. بەڵام وادیاره ئێران هێشتا [کەمێک!!] ئەم وتە ئینگلیزییەی بەسەردا جێبەجێ دەبێ: "هەندێجار پێویستە چەند مریشکێک بە بەرچاوی مەیمونەکەوە بکوژیت بۆ ترساندنی مەیمونەکە".
کەوایە، ئەمەی ئێستا دەیسەلمێنێت کە ئێران لە ژێر هەڕەشەدا دانوستانی قبوڵ کردوە. ئێران مەبەستێتی لە یەک بواردا سازش بۆ ئەمریکا بکات، ئەویش؛ [پرسی ئەتۆمە].
بەڵام ئەمریکا دەیەوێت لە دو بواردا ئێران تەسلیمی ببێت:
یەکەم: پرسی ئەتۆم.
دووەم: کەیسی گەروی هورمز.
بەڵام، بەلای ئیسرائیلەوە؛ وتە ئینگلیزییەکە [بەتەواوی!] بەسەر ئێران کارناکات و، دەبێت خودی [مەیمونەکە!] بکرێتە ئامانج، واتە: دەبێت ڕژێمەکە بڕوخێنرێت! هەربۆیەشە، نەتەنیاهۆ بە دانوستانی ئەمریکا لەگەڵ ئێران ناڕازییە.
نەتەنیاهۆ بڕوای وایە: ئێران دەبێ مەترسی لەسەر ئیسرائیل دروست نەکات و لەم بوارانەش پاشەکشە بکات:
١-وازهێنان لە بەرنامەی موشەکی بالیستیی.
٢-وازهێنان لە دروستکردنی فڕۆکەی بێفڕۆکەوانی ستراتیژی.
٣-وازهێنان لە پاڵپشتی لەو میلیشیاو هێزانەی کە دژە ئیسرائیلن.
تاڕادەیەک دەتوانرێ بوترێ: هەردو ئامانجەکانی ئەمریکاو ئیسرائیل، یەکتر تەواو دەکەن. چونکە کاتێک ئەمریکا خواستی زاڵبونی بەسەر گەروی هورمز دا هەیه، واتە: ئامانجێتی ئابوری ئێران بخنکێنێ و، جوڵەی دەریایی ئێران مۆنۆپۆل بکات. ئەوەش مانای گەمارۆی ئێران و داغان کردنیەتی لە دورمەودا دا. چونکە بە خنکاندنە ئابورییەکە؛ تا ئەندازەیەک ڕێ لە پرۆژە ستراتیژییەکانی تەکنەلۆژیای جەنگیی ئێران دەگرێت. بە زاڵبونیشی بەسەر هورمز دا؛ ئاگاداری زۆربەی جوڵەکانی ئێران لەگەڵ چین و حوسییەکان و هتد دەبێت!
کەوایە، هاوکێشەکە بەجۆرێکە ئەمریکاو ئیسرائیل دو ڕوی یەک دراون و یەکتر تەواو دەکەن بەرانبەر بە ئێران.
بەڵام، نەتەنیاهۆ پەلەیەتیی و، پێی وایە: مانەوەی ئێران [بەلاوازی]یش هەر دەبێتە هۆی بەهێزبونەوەی بەرەی مقاومە، چونکە ڕژێمی ئێران هەڵگری ئایدۆلۆژیای وەلی فیقهەو، مانەوەی وا دەکات ئەو ئایدۆلۆژیایە دەمەزەرد ببێتەوە.
بەڵام، ئەمریکا لەمەدا، وەک نەتەنیاهۆ، پەلەی نییەو، ئەمریکا نەفەسدرێژتره. بەم پێیە، ستراتیژی ئیسرائیل و ئەمریکا؛ ڕوخاندنی ئەم ڕژێمەی ئێرانە، بەڵام هەر یەکەیان بە تەکنیک و تاکتیکی جیا، کە عاقیبەت لەسەری ساغدەبنەوە.
کەوایە: باشترە میدیاکاران و نوسەرانی "کورد، عەرەب، فارس و، تورک"؛ واز لەو پڕوپاگەندەیەیان بێنن کە ئیسرائیل و ئەمریکا دو ستراتیژی جیاوازیان بەرانبەر بە ئێران هەیە. بەڵکو وەک شیکرایەوە:
ستراتیژی ئیسرائیل و ئەمریکا؛ ڕوخاندنی ئەم ڕژێمەی ئێرانە، بەڵام هەر یەکەیان بە تەکنیک و تاکتیکی جیا، کە عاقیبەت لەسەری ساغدەبنەوە.
پایەیەک لە سیاسەتی دەرەوەی ئەمریکا هەیە، کە: لە داڕشتنی سیاسەت و ستراتیژەکانی ئەمریکادا "ئیسرائیل هێڵی سورە".
بەو مانایەی: "پاراستنی ئیسرائیل بەشێکە لە پاراستنی بەرژەوەندییەکانی ئاسایشی نەتەوەیی ئەمریکا".
واتە: هەڕەشەی ستراتیژی لەسەر ئیسرائیل، دەکاتە؛ هەڕەشە بۆ سەر ئاسایشی نەتەوەیی ئەمریکا.
بەم پێیە؛ دەکرێ هەنگاوە تەکنیک و تاکتیکییەکان بۆ ڕوبەڕوبونەوەی ئێران جیاوازی هەبێ و، لە ڕوی [کات]یشەوە حەوسەڵەی بوێ. وەلێ ئامانجە ستراتیژەکەی ئەمریکا-ئیسرائیل هەر یەک شتە!
لە دوایین ڕاپرسی کەناڵی سی-بی-ئێسیش دا، ئاماری پشتیوانیی لە ترەمپ بۆ جەنگەکە زیادی کردوە، بەجۆرێک وەک لە داتاکەدا دەیبنینن:
لە ٪٧٠ ی خەڵکی ئەمریکا لە مانگی شەشی ئەمساڵ بڕوایان وابوە کە دەبێت ئەم جەنگە بوەستێنرێ، کەچی لە مانگی حەوت دابەزیوە بۆ ٪٦٧.
لە ٪٢٢ ی خەڵکی ئەمریکا لە مانگی شەش بڕوایان بە بەردەوامییدان بە جەنگەکە هەبوە، کەچی لە مانگی حەوت لە ٪٣٣ لەگەڵ ئەوەدان جەنگ بەردەوام بێ هەتا ڕژێمی ئێران خۆی بەدەستەوە دەدات و دان بە شکستی خۆیدا دەنێت.