چەن دەنگێ لە ئەو دیو سنووری دەرگە داخراوەکانەوە!
دوکتۆر حوسێن موحەممەد عەزیز
2021-08-02 673
لە ئەم گرتووخانە گەورەیەی، ژیانی ڕۆژانەی گەلەکەماندا، کۆمەڵێ
دەنگی ناڕەزایی بەرزبووتەوە. هەر یەکێ لە ئەو دەنگە کپکراوانەش، لە ئاوازێکی
جیاوازی پڕ سەیروسەمەرە دەخوێنن!
یەکەمین دەنگ: پێشکەوتووخوازێ
زۆر بە توندی، لە دەرگەی ژووری زیندانەکەی خۆی دەدا و دەقیژێنێ:
ئەی هاوار! من تاوانم چییە؟! من بە ئازادیی لەدایکبووم و دەمەوێ، هەر بە ئازادیی
بژیم و بە ئازادییش بمرم!
دووەمین دەنگ: مەلایەک
لە کونی دەرگەکەوە، هاواری لێ هەڵستابوو، دەیگوت: ئاخر
ئازادیی سنووری هەیە. بە هیچ شێوەیە نابێ، سنوورە قەدەغەکان ببەزێنین!
سێیەمین دەنگ: هەلپەرستێ
ئەو ئازادییەی ئێوە داوایدەکەن، نابێ، دژی
دابونەریتەکانی گەل بێ!
چوارەمین دەنگ: دیکتاتۆرێ
لە ئەم وڵاتەدا، یاسا و دەسەڵات هەیە. هەر کەسێ لە
سنووری یاسا لابدا، دەنگ هەڵبڕێ و ئاژاوەبنێتەوە، ڕیزەکانی گەل تێکبدا، لێی قەبووڵ
ناکەین و بێدەنگ نابین!
* * *
یەکەمین دەنگ: ئازادیی هەر ئازادییە و یەک واتای هەیە.
ئەم کۆتوپێوەندانە ئیوە داتانناوە!
دووەمین دەنگ: مرۆ هێندە ژیر نییە، چارەنووسی خۆی بگۆڕێ.
چونکە لە ئەو ئاستە بەرزەدا نییە، بەرنامە بۆ ژیانی خۆی داڕێژێ. بەڵکوو هەموو ئەو
شتانە، هەر لە ڕۆژی درووستبوونی ئەم جیهانەوە، بڕاوەتەوە و ڕەنگیان ڕێژراوە!
سێیەمین دەنگ: بە ترس و لەرزەوە، با لە دابونەریتی کۆنی
باووباپیرانمان لانەدەین، کارێ نەکەین، زیان بە پەزەکان بگەیەنێ.
چوارەمین دەنگ: بێدەنگبن. ئێوە ئاسنی سارد دەکوتن. ژیان
هەروابووە و هەر واشدەبێ.
* * *
یەکەمین دەنگ: نا نا نا، بە هیچ شێوەیە، من ئامادەنیم،
وەک کۆیلە بژیم. بەڵکوو ئامادەم، لەپێناوی ئازادیی و ژیانێکی شایستە بە مرۆڤ،
هەموو ئەو دەنگانە کپکەم، کە لە ئازادیی مرۆ کەمدەکەنەوە.
دووەمین دەنگ: ئەو دەنگانە، دەنگی ئاسمانە، ئەوەتەی ژیان
لەسەر ئەم زەویە پەیدابووە، هەر هەبووە و هەر دەشمێنێ. بێدەنگبە، بە تۆ کپ ناکرێ و
قیژەقیژ مەکە، ئەگینا دەبیتە خۆراکی ئاگر!
سێیەمین دەنگ: بە دەنگێکی کزۆڵەوە دەڵێ: باشتر وایە،
وازبێنن، با نە شیش بسووتێ و نە کەباب.
چوارەمین دەنگ: گەر بێدەنگ نەبن و سەری خۆتان کزنەکەن،
ئازادیی و ئامانجتان پیشاندەدەین، چونکە هەر شەق دەزانێ، قۆناغ لە کوێیە!
* * *
یەکەمین دەنگ: بڕوخێ بیدەنگی، نا بۆ سنوورە قەدەغەکان،
سەرشۆڕیی بۆ دەنگە کزۆڵە هەلپەرستەکان، مەرگ بۆ قامچی بەدەسەکان، بژی ئازادیی، بژی
دادپەروەریی، بژی یەکسانیی.