لە جیهاندا (22) دەوڵەتی عەرەبی و (57) دەوڵەتی ئیسالامی هەیە. کۆمەڵانی خەڵک، ڕێکخراوی دێمۆکراسی، پارتی ڕامیاری و هێندێ دەوڵەت، بۆ دانیشتووانی (غەزە) دەگرین و قووڕدەپێون. کەچی لە کاتێکدا، نەتەوەیەکی بێکەسی بندەستی خاک داگیرکراوی وەک نەتەوەی کورد، لەنێوان (40-50) میلیۆن مرۆڤ دەبێ، لە ئەو ژمارە زۆرە، یەک دوو ڕێکخراو و دەوڵەتی ئیسلامی و نائیسلامی نییە، دژی دوژمنانی کورد و داگیرکەرانی (کوردستان) دەنگبەرزکەنەوە. تەنانەت دژی چەوساندنەوە و پاکتاوکردنی ڕەگەزی ڕۆڵەکانی نەتەوەی کورد، هەڵوێستێکی مەردانە و مرۆڤانە بنوێنن، بە تایبەتی ئیسلامی ڕامیاری، چ سەر بەکورد و چ سەر بە نەتەوە موسوڵمانەکانی دیکە، دەنگێکیان لێوە نایە و هەڵوێستێکی مرۆپەروەرانە نانوێنن. وەک ئەوەی ڕۆڵەکانی نەتەوەی کورد، موسوڵمان نەبێ، کورد وەک هەموو دانیشتووانی سەر ڕووی مرۆڤ نەبێ، ئێدی نەتەوەیەکی وا بێکەس و داماو، پەنا بۆ کێ بەرێ؟! تۆ بڵێی، یەزدانی مەزنیش، دەستی لە کورد شتبێ، وا بە دەنگ هاوار و نزا و پاڕانەوەی دایکانی کوڕکوژراو، هاواری ڕۆڵەکانی ئەم نەتەوە چەوساوە و هەژارەوە، ئەم نەتەوە موسوڵمانەوە نەیە؟!!