نووسەر و مامۆستای زانکۆ

ڕۆژی (13. 9. 2019)، بە ڕێککەوت بەژێر پردەکەی نێوبازاڕدا تێپەڕیم. لە سوچێکەوە جمکوتێکی سەیرم بینی. کاتێ نزیکبوومەوە، شەڕەکەڵەشێر بوو. دوو کەڵەشێری لاواز، ملدرێژ، باڵابەرز، پەڕیان بە مل و باڵی یەکدییەوە نەهێشتبوو. زوو زوو، لە یەکدی دووردەکەوتنەوە و دیسانەوە، گوڕیاندەبەستەوە و پەلاماری یەکدیان دەدایەوە.

خەڵکەکەش، لە دەوری گۆڕەپانی شەڕەکە کۆبووبوونەوە، زۆر بە پەرۆشەوە، تەماشای ئەو شەڕە خۆتڕێنەیان دەکرد و بەسەر دوو دەستەدا دابەشبووبوون. هەر دەستەیەکیان، لایەنی یەکێ لە کەڵەشێرەکانی دەگرت و هاواریاندەکرد: دەی بە قوربانتبم، خێراکە، پەڕی پێوە مەهێڵە و باڵەکانیشی هەڵکێشە!

منیش، کاتێ ئەو دیمەنە سەیرەم بینی، بە شێوەیەکی دیکە، بیرم لێ کردەوە. چونکە دوو کەڵە شێرەکەم، بە (جەلالیی) و (مەلایی)، خەڵکە هاندەرەکەشم، بە هەر (4) دەوڵەتە داگیرکەرەکەی (کوردستان) هاتە پێش چاوم!

شەڕەکە بەردەوامبوو. هەردوو کەڵەشێرەکە، شەڕی مان و نەمانیان دەکرد. خەڵکە تەماشاکەرە بێ بەزەییەکەش تا دەهات، پتر شەڕەکەیان گەرمدەکرد. کەسێکیش نەبوو، لێکیانکاتەوە. ئەوانیش بە تەواوی ماندووبووبوون، بەڵام هەر وازیان نەدەهێنا، چونکە بڕیاریاندابوو، لایەکیان لاکەی دیکەیان ببەزێنێ و زوو، کۆتایی بە ئەم جەنگە بێنن!