نووسەر و مامۆستای زانکۆ
گەر لەنێوان دەوڵەتی سەربەخۆی (کوردستان) و دەوڵەتی جێنشینی ئیسلامیدا، لەنێو ڕۆڵەکانی نەتەوەی کورددا، گشتپرسێکی ئازاد و ڕاستەقینە سازکرێ، ئەوا زۆربەی نەتەوەی کورد بە گشتی و ئیسلامی ڕامیاری بە تایبەتی، دەنگ بۆ جۆری دووەمیان دەدەن. ئەمە بۆچی وایە؟!
چونکە جگە لە ئەوەی، هەستی نەتەوەیی ڕۆڵەکانی کورد لاوازە، سەرکردەی پارتە دەسەڵاتدارەکانی (کوردستان)یش، لە ماوەی ئەم چەن ساڵەی دەسەڵاتیاندا، کارێکی وا باشیان نەکردووە، تا کۆمەڵانی خەڵک، لە ئەوە دڵنیابن، نیشتمانێکی ئازاد و خۆشگوزەرانیان بۆ بنیاتدەنێن. ئەوە جگە لە ئەوەی، بە ئەو پێیەی زۆربەی هەرە زۆری، ڕۆڵەکانی گەلی کورد موسوڵمانن و بڕوایان بە ئایینی ئیسلام هەیە، لەبەرئەوە ئایین وەک تلیاک، کارێکی زۆر خراپی، لە هەست و هۆش، بیر و باوەڕیان کردووە!
لە ئەو بارەیەوە، دەوڵەمەنترین پیاوی چین (Jack Ma) گوتوویەتی: گەر پارە و مۆز، لەبەردەم کۆمەڵێ مەیمووندا دابنێین، مۆزەکە هەڵدەبژێرن. چونکە نازانن، بە پارە دەتوانن، مۆزی پتری پێ بکڕن!
منیش دەڵێم: ئەوانەی سەربەخۆیی نیشتمان و دامەزراندنی دەوڵەتی (کوردستان) ڕەتدەکەنەوە، وەک ئەو مەیموونانە وان، چونکە نازانن، سەربەخۆی و سەربەستی ڕاستەقینە، لە ژێردەستی هەموو جۆرە دەوڵەتێکی داگیرکەری بیانی باشترە!
ئاخر چۆن پارە، هەموو شتێکی پێ دەکڕرێ، سەربەستی نەتەوەییش، لە هەموو داگیرکردن و دابەشکردن، دەستدرێژی و ڕاونان، گرتن و کوشتنوبڕین، ئەنفال و کیمیابارانێ، نەتەوەکە دەپارێزێ!
لێرەدا هەر ئەوە ماوە، بڵێم: کاتێ کورد، مێژووی لەخوێنهەڵکێشراوی خۆی بیردەچێتەوە، دوژمنی داگیرکەر بە برا و براکانی خۆشی، بە دوژمن دەزانێ، سەربەستی و سەربەخۆیی نیشتمانەکەی ڕەتدەکاتەوە، ئەوە جگە لە ئەوەی، کەرۆنۆلۆژیا و مەیمۆنۆلۆژیا نەبێ، هیچی دیکە نییە!